iklan

POLÍTIKA

Komisaun Permanente La Halo Reuniaun Tanba Laiha Ajenda

Komisaun Permanente La Halo Reuniaun Tanba Laiha Ajenda

Prezidente Parlamentu Nasionál, Aniceto Lopez Guterres.

DILI, (TATOLI) – Prezidente Parlamentu Nasionál, Aniceto Lopes Guterres, informa ba Prezidente Repúblika, Francisco Guterres Lú Olo, katak Komisaun Permanente PN seidauk halo reuniaun ba daruak tanba laiha ajenda prinsípiu hanesan mós plenária.

“Komisaun Permanente maka substitui plenária Parlamentu Nasionál atu halo deliberasaun ba asuntu ruma. Se laiha ajenda, laiha reuniaun Komisaun Permanente”, Aniceto hato’o ba jornalista sira iha Palásiu Prezidente Nicolau Lobato, Bairru Pité, hafoin enkontru ho Xefe Estadu, kuarta ne’e.

Nia esplika ajenda ne’e tenke liga ba kompeténsia Komisaun Permanente hanesan asuntu urjénsia, liu-liu Estadu Sítiu ka Estadu Emerjénsia nomós asuntu seluk ne’ebé ho karáter urjente.

“Agora Parlamentu Nasionál iha situasaun ida disolvidu, tanba ne’e funsionamentu Komisaun Permanente ho kompeténsia ne’ebé limitadu. Lahanesan ho Parlamentu Nasionál ne’ebé normál nian”, tenik Aniceto.

Kona-ba pergunta ne’ebé membru Komisaun Permanente balun hato’o ba Governu liga ba serbisu Governu nian ne’ebé hamosu konfuzaun, nia dehan Governu sei hatán pergunta hirak ne’e pur-eskritu ho prazu loron 30.

“Prazu loron 30 seidauk hotu, ne’e duni ita hein to’ok Governu sei hatán ka lae tanba desizaun kabe ba Governu rasik”, esklarese.

Jornalista: Xisto Freitas

Editora: Rita Almeida

iklan
iklan

Leave a Reply

iklan
error: Content is protected !!