KM Seidauk Aprova Subsídiu Ba CNE

0
108
Prezidente CNE, Alcino Barris. Foto Antonio Goncalves

DILI (TATOLI)-Governu liuhosi reuniaun konsellu Ministru, horisehik (Kinta) ne’e la konsege aprova proposta hosi Komisaun Nasionál Eleisaun (CNE-Sigla Portugés) kona-ba subsídiu hodi fasilita servisu ba eleisaun antisipada.

Lei órgaun administrasaun eleitorál númeru 7/2016 hateten, hahú Prezidente Repúblika marka data eleisaun to’o publikasaun final hosi Tribunal Rekursu, CNE no órgaun eleitorál sira iha diretu ba subsídiu extra-ordináriu ida.

ʺTanba ne’e ami mai klarifika tanba subsídiu extra-ordináriu ne’e tenke dekreta iha dekretu governu,” Prezidente Komisaun Nasionál Eleisaun Alcino Baris informa hafoin Partisipa reuniaun KM iha Palásiu Governu, horisehik.

Nia dehan tan, komisáriu no funsionáriu públika hosi CNE no STAE ne’ebé servisu liu oras no fin de semana, inklui sira ne’ebé servisu diasporas (iha rai li’ur) maka sei simu durante eleisaun antisipada, bainhira konsellu ministru aprova proposta ne’ebé CNE submete ona.

“Hatama ona proposta, maibé montante Konsellu Ministru maka deside montante ida ne’ebé maka ami propoin,ʺ Prezidente CNE esplika.

Funsionáriu CNE iha Nasionál no Munisípiu hamutuk 100 resin, maibé subsídiu ne’e aplika ba sira ne’ebé servisu. Entretantu, data kampaña Partidu Polítiku ba eleisaun antisipada komesa iha 10 Abríl, termina 9 Maiu 2018 no 12 Maiu data ba Eleisaun Antisipada.

(Jornalista: Agapito dos Santos)

(Editór : Manuel Pinto)

HUSIK IDA HATÁN