KM Dezigna Horta Sai Altu Reprezentante Ba ASEAN

0
594
Enkontru Konsellu Ministru, iha loron 1 fulan-marsu, Foto dokumentasaun GPM

DILI, (TATOLI) – Governu liuhosi reuniaun Konsellu Ministru (KM) dezigna (hatudu) atuál Ministru Estadu no Konselleiru ba Seguransa Nasionál, José Ramos Horta, sai altu reprezentante Timor-Leste iha prosesu negosiasaun adere ba Asosiasaun Nasaun Sudeste Aziátika (ASEAN-Association of Southeast Asean Nations).

Sekretáriu Estadu Konsellu Ministru no Komunikasaun Sosiál, Matias Boavida, esplika proposta rezolusaun governu ne’ebé aprezenta husi Ministru Negósiu Estranjeiru no Kooperasaun, Aurélio Guterres, aprovadu ho alterasaun balun atu reforsa koordenasaun rekursu no prosesu adezaun ba ASEAN

“Iha proposta ne’e Konsellu Ministru dezigna Ministru José Ramos Horta nu’udar altu reprezentante Timor-Leste iha prosesu negosiasaun atu adere ba ASEAN”, tenik ba jornalista sira hafoin remata reunian KM iha Palásiu Governu, ohin.

Portavoz Governu ne’e dehan Governu iha interese maka’as kona-ba oinsá Timor-Leste atu sai membru ASEAN, tanba durante ne’e servisu la’o maibé nunka hetan lampu verde bainhira mak adere ba asosiasaun ne’e.

“Governu dahituk iha ninia importánsia maka’as ba Timor-Leste atu adere ba ASEAN, ne’e duni dezigna ema ida atu bele lidere komisaun ne’e atu bele halo servisu lais liu no iha luz (lampu) verde bainhira mak ita bele adere ba ASEAN”, katak.

Antes ne’e, bainhira partisipa iha simeira ASEAN iha Manila, Ministru Aurélio haktuir TL hetan ona sinál di’ak tanba hetan apóiu husi membru ASEAN hotu, mesmu Singapura mak sei preukupa kona-ba kapasidade Timor-Leste atu kumpri rekezitu ba adezaun.

Alende ne’e TL mós dalabarak partisipa seremónia ASEAN nia no ikus liu mak partisipa diskusaun tékniku kona-ba adezaun ba ASEAN iha Bali, Indonézia.

Iha diskusaun ne’e diskute kona-ba rezultadu avaliasaun husi grupu servisu ASEAN ne’ebê lidera husi Filipina, nune’e mós analiza estudu viabilidade kona-ba preparasaun TL atu kumpri kritéria adezaun iha área polítika, seguransa, ekonomia no sosiál.

Entretantu, Timor-Leste submete aplikasaun iha loron 4 Marsu 2011.

Dadaun ne’e ASEAN iha ona membru 10, kompostu husi Indonézia, Thailandia, Vietnam, Malázia, Singapura, Filipina, Kambódia, Myanmar (Burma), Laos no Brunei.

Dadaun ne’e Filipina mak lidera asosiasaun ne’e desde tinan 2017.

Jornalista: Julia Chatarina

Editora: Rita Almeida

HUSIK IDA HATÁN