Kada Loron Ró 30 to’o 50 Halo Atividade Peska Ilegál

0
98
Foto/Google.

DILI, (TATOLI) – Diretór Jerál Peska, Ministériu Agrikultura no Peska (MAP), Acácio Guterres, hatene kada loron atividade peska ilegál ita tasi-mane kuaze ró hamutuk 30 to’o 50 resin mak hakail ikan.

“Informasaun ne’ebé ita hetan liuhusi VMS ne’ebé Governu Japaun liuhusi JICA apoiu mai ita, ita bele monitor loroloron ró sira ne’ebé haka’er ikan iha ita-nia tasi nune’e mós website global fishing watch no iha semana kotuk husi Austrália informa mai katak ró barak depois ami haree ida pur ida, loron ida kuaze ró 30 to’o 50 resin mak ka’er ikan iha ne’ebá”, Acácio relata iha Komoro, ohin.

Ho kazu ida ne’e sai hanesan preokupasaun boot ida oinsá mak atu haree ida ne’e hodi diminui peska ilegál.

Nune’e husi Diresaun Jerál Peska sei bolu kompañia Hong Long atu tuur hamutuk fali hodi ko’alia sobre tarefa foun ne’ebé hasai ba espésie ikan ne’ebé atu hakail para sira halo fali atividade iha tasi laran tanba liuhusi informasaun ne’ebé hetan katak parte súl ne’e atividade peska ilegál komesa barak ona, nune’e prezensa ró ne’ebé hetan lisensa iha parte súl bele diminiu peska ilegál.

Tanba foin daudaun Governu suspende hela atividade Hong Long ba kazu Tubarun nian ne’ebé iha hela prosesu investigasaun iha Porkuradór Jerál munisípiu Baukau nian maka liuhusi reuniaun Konsellu Ministru iha novembru 2017 deside ona no haruka karta ba Prokuradór Jerál Repúblika hodi hein prosesu no husi parte prokuradór mós hakerek karta fali ba Primeiru-Ministru no Xefe Governu ne’e hatún despaxu ba ministru atu prosesa atividade Hong Long nian para kontinua.

“Despaxu ministru sai tiha ona no ami entrega ona ba kompañia atu mai para ita hamutuk atu haree oinsá nia kontinuasaun lisensa ne’e. Ami agora hein hela, parese fin semana ida ne’e kompañia mai tuur hamutuk ho peska para haree sira-nia prosesu atu kontinua fali”.

Husi kompañia prontu nafatin atu hala’o atividade iha Kosta Súl maka liuhusi sorumutu ne’e mak sei deside.

“Kompañia mós sei haree filafali tanba sira-nia prosesu ne’e agora iha hela Prokuradór Jerál munisípiu Baukau nian ne’ebé ami bolu sira atu halo diskusaun, nune’e mós ita hein desizaun Prokuradór Jerál husi Baukau mós bele hasai desizaun ruma para ita bele hahú ona”.

Jonalista: Maria Auxiliadora

Editora: Rita Almeida

HUSIK IDA HATÁN