Jornalista Tenke Uza Meius Profisionál

0
100
Prezidente Konsellu Imprensa, Virgilio Guterres.

DILI, (TATOLI) – Prezidente Konsellu Imprensa, Virgílio Guterres, hateten jornalista tenke uza meius profisionál atu hetan benefísiu.

“Meius profisionál maka sé ha’u serbisu ba mídia A, fasilidade ka ekipamentu ne’e tenke mai hosi mídia A. Katak, mídia A maka kontratu ha’u halo serbisu, entaun perdiem (osan viajen), osan komunikasaun no osan transporte, mídia A maka tenke iha obrigasaun prepara ba ha’u, la’ós instituisaun seluk”, Virgílio hato’o ba jornalista sira iha Palásiu Prezidente Nicolau Lobato, Bairru Pité, sesta ne’e, relasiona ho jornalista sira nia preokupasaun ba deklarasaun hosi Sekretáriu Estadu Konsellu Ministru no Komunikasaun Sosiál, Matias Freitas Boavida, ne’ebé kestiona perdiem ba jornalista sira.

Nia dehan kuandu aseita perdiem hosi instituisaun seluk, importante tenke fó informasaun ba xefe redasaun ou diretór informasaun hosi mídia ne’e rasik, nune’e xefe redasaun bele hatene katak ninia jornalista simu perdiem ka fasilidade ruma hosi instituisaun seluk.

“Aseita fasilidade sira ne’e dala barak influensia jornalista ida nia konteúdu notísia. Jornalista iha direitu ba perdiem maibé perdiem ne’e tenke mai hosi ninia mídia rasik”, afirma tan.

Nia hatutan jornalista sira ne’ebé hetan ona karteira profisionál, bainhira iha evidénsia ruma ne’ebé maka to’o Konsellu Imprensa katak jornalista balun simu perdiem, KI sei fó sansaun.

“KI nia intervensaun ne’e liu-liu ba jornalista sira ne’ebé simu ona kartaun profisionál nomós ba maluk sira ne’ebé estajiáriu, katak iha ema ruma hato’o evidénsia katak jornalista sira simu perdiem, KI sei komunika ho mídia ne’ebé jornalista ne’e serbisu ba atu fó xamada atensaun no ikus sei dada fila karteira profisionál hosi jornalista ne’e”, realsa.

Jornalista: Xisto Freitas

Editora: Rita Almeida

HUSIK IDA HATÁN