Investe Milhões de Dólares, Investidór Neen Preparadu

0
164
Ministru Turizmu (MT), Manuel Vong. Foto Tatoli/Egas Cristovao.

DILI, (TATOLI)-Ministru Turizmu, Manuel Vong, informa durante fulan haat nia laran iha ona kompañia 30 resin ne’ebé mak hakarak atu investe iha setór turizmu no iha neen mak preparadu atu aprezenta sira-nia planu negósiu oinsá mak atu halo investimentu.

“Liuliu iha otél, resort no la’ós iha Dili de’it, maibé sira balun mós hakarak atu ita aloka sira bá iha Baukau, Lospalos tanba ita haree investidór potensiál sira ne’e investe la’ós ho osan uitoan, milhões de dólares, balun aprezenta iha 450, balun iha bilhões de dólares entaun hanesan ho Pelican Paradise ne’ebé Governu formaliza ona sira-nia kontratu”, Vong hatete iha Lesidere hafoin inaugura Sentru Informasaun Turístika, horisehik.

Kompañia hirak ne’ebé atu aprezenta planu negósiu iha tempu badak sei halo aprezentasaun uluk iha MT, depois ba instituisaun relevante hanesan TradeInvest, SERVE no Ministériu Justisa tanba relasiona ho rai no Obra Públika  kona-bá ambiente nian no Ministériu Komérsiu no Indústria ho nune’e Timor-Leste prontu hodi prepara aan para halo investimentu ida ne’ebé di’ak liuhusi setór turizmu.

Aleinde ne’e bainhira permite iha tempu badak sei halo mós aprezentasaun iha Konsellu Ministru atubele hetan liután apresiasaun ba sira-nia investimentu ne’ebé maka sira sei halo.

Kompañia sira ne’e balun mai husi Estadu Unidu Amérika, Malázia, Indonézia no seluk tan.

“Kriasaun kampu traballu Pelican Paradise nian pur volta ema 1500 kada shift signifika loron ida halo shift tolu karik entaun 450 traballadór ne’ebé diretu no ida indiretu barak liután liuliu ba iha transporte, akomodasaun, ligasaun ho peska no agrikultura. Aleinde ne’e sei kontribui taxa,” Vong hatutan.

Jornalista : Maria Auxiliadora

Editór : Manuel Pinto

HUSIK IDA HATÁN