Inspesaun Iha Ataúru Halo Apreensaun Ba Produtu Liu Prazu 51

0
29
Pesoál AIFAESA sira halo inspesaun iha loja. Foto AIFAESA.

DILI, (TATOLI) – Inspesaun ne’ebé Autoridade Inspesaun no Fiskalizasaun ba Atividade Ekonómika no Sanitária (AIFAESA) halo iha Postu Administrativu Ataúru, Autoridade Munisipál Dili ba estabelesimentu 10, restaurante lima, supermerkadu haat no loja haat ne’e hetan infratór neen.

Diretór Operasionál, AIFAESA, Gabriel da Costa, hatete inspesaun ne’e halo apreensaun ba produtu ne’ebé liu prazu hamutuk 51 hanesan saos, susu-been, biskuit no beng-beng.

“Husi parte AIFAESA liuhusi inspetór sira foti ona prosesu ba estabelesimentu refere para submete ba parte jurídiku no sei notifika para sira aprenzenta sira-nia defeza”, katak Gabriel iha Palásiu Governu, ohin.

Produtu ne’ebé apreende ne’e, AIFAESA serbisu hamutuk ho polísia eskuadra Ataúru no Administradór halo kedan distruisaun ba sasán refere.

“Sira kontente ho prezensa AIFAESA tanba fó netik lisaun ba sira para tau atensaun liuliu ba sira-nia produtu. Abitante iha ne’ebá husu atu kotinua rekolla sasán liu prazu iha aldeia no suku sira”, relata Gabriel hafoin halo inspesaun iha Ataúru sábadu foin lalais ne’e.

Jornalista: Maria Auxiliadora

Editora: Rita Almeida

HUSIK IDA HATÁN