Horta Ko’alia Indultu ho Prezidente Repúblika

0
45
Eis Prezidente Repúblika atuál Ministru Estadu Konseleiru ba Seguransa Nasionál, José Manuel Ramos Horta, bainhira hasoru Prezidente Repúblika, Francisco Guterres Lú Olo, atu fó indultu ba prizioneiru sira, iha Palásiu Prezidente Nicolau Lobato, Bairru Pité, kuarta ne’e. Foto mídia PR

DILI, (TATOLI) – Eis Prezidente Repúblika atuál Ministru Estadu Konseleiru ba Seguransa Nasionál, José Manuel Ramos Horta, koordena ho Prezidente Repúblika, Francisco Guterres Lú Olo, atu fó indultu ba prizioneiru sira.

“Ha’u mai hasoru Prezidente Repúblika hodi ko’alia asuntu ida de’it, maka prosesu indultu ba prizioneiru sira iha Bekora no Gleno”, Horta hato’o ba jornalista sira iha Palásiu Prezidente Nicolau Lobato, Bairru Pité, kuarta ne’e.

“Ha’u aprezenta argumentu ba Xefe Estadu katak indultu ne’e la’ós de’it Prezidente nia direitu Konstitusionál maibé obrigasaun ida. Konstituisaun tau iha ne’ebá fó oportunidade no fó obrigasaun ida ba Prezidente para sukat kazu individuál”, esplika.

Nia dehan kontente tanba Prezidente Repúblika konkorda ho opsaun indultu no oras ne’e Xefe Estadu sei estuda hela oinsá mekanizmu fó indultu.

“Buat sira ne’e liuhusi Ministériu Justisa. Ha’u ko’alia tiha ona ho Ministra Justisa, Maria Ângela Carrascalão, no oras ne’e Ministériu Justisa prepara daudaun kretéria mai hosi lei atu lori aprezenta ba Konsellu Ministru, hafoin ne’e haruka ba Prezidente atu fó”, esklarese.

Nia salienta Prezidente Repúblika mós iha direitu hatama dadur balun iha lista indultu nian, karik Prezidente haree katak dadur ne’e merese duni atu hetan indultu.

Horta hatutan kritéria atu fó indultu ne’e liu-liu haree ba dadur sira nia komportamentu di’ak (disiplina), razaun umanitáriu, moras no idade avansadu.

Tuir planu, indultu ne’e sei hala’o iha loron Restaurasaun Proklamasaun Independénsia, 20 maiu tinan ne’e.

Kona-ba númeru dadur ne’ebé atu hetan indultu, Horta tenik seidauk hatene no ida ne’e kabe ba Ministériu Justisa nia avaliasaun ba dadur sira.

Jornalista: Xisto Freitas

Editora: Rita Almeida

HUSIK IDA HATÁN