Hasa’e Kualidade Neneik Maibé Bebeik

0
106
Diretora Departamentu KS (Komunikasaun Sosiál), Dominica Dwikory. Foto FB: Eujevio Pereira

DILI, (TATOLI) – Diretora Departamentu Komunikasaun Sosiál, Dominica Dwikory, garante sei hasa’e kualidade estudante KS, Universidade Nasionál Timor Lorosa’e (UNTL) liuhusi kria rede ho organizasaun seluk, tanba ne’e fiar katak kualidade estudante sei akontese neneik maibé bebeik.

Organizasaun sira ne’ebé durante ne’e serbisu hamutuk no apoia ona mak Konsellu Imprensa (KI), United Nations Educational, Scientific and Cultural Organization (UNESCO), Partnership Human Development (PHD)-Austrália no seluktán.

“Marsu ne’e PHD lansa treinamentu i depois husi UNESCO serbisu hamutuk ho Konsellu Imprensa, Timor-Leste atu halo mós treinamentu kona-ba video, entaun ami fiar katak neneik, neneik maibé bebeik hodi hasa’e kualidade estudante”, dehan ba jornalista sira iha kampus Kaikoli, sábadu ne’e.

Buka Solusaun

Dominika Dwikory akresenta relativamente ho númeru estudante na’in 157 ba tinan letivu 2018, departamentu hasoru difikuldade kona-ba sala hanorin nian iha Fakuldade Siénsia Sosiál (FSS) tanba fakuldade ne’e departamentu neen mak uza.

Departamentu sira ne’e mak Administrasaun Públika, Dezenvolvimentu Komunitáriu, Komunikasaun Sosiál, Polítika Públika, Relasaun Internasionál no Siénsia Governamentál eh Siénsia Polítika

“Entaun dosente fahe ba turma três (tolu), ida ne’e fó impaktu ba prosesu aprendizajen maibé ami koko rezolve”, katak tan.

Ida mak atu uza sala Instituto Nacional de Formação de Docentes e Profissionais da Educação (INFORDEPE), karik bele. Seluk iha fakuldade no seluk tan mak iha Kampus Sentrál, avenida sidade Lisboa Dili.

“Maibé ita mós presiza hanoin kona-ba laboratóriu tanba bainhira estudante barak susar estudante sira halo prátika ho di’ak. Ha’u fiar no nafatin fiar reitór no estrutura UNTL tomak atu hadi’a situasaun ida ne’e”, tenik.

Fatin sira ne’ebé durante ne’e laboratóriu ba estudante KS iha UNTL hodi prátika mak Rádiu Akadémika, 90.00 FM lokaliza iha kampus Liceu, mini estúdio fotográfia no video iha kampus FSS, Kaikoli inklui halo estájiu profisionál iha órgaun komunikasaun sosiál sira iha Timor-Leste.

Dosente ne’e mós realsa departamentu kria liña koordenasaun entre departamentu, fakuldade no universidade no sempre halo kontaktu hodi hato’o difikuldade sira, liuhusi enkontru sira.

“Ida ne’e sempre, entaun ami koko ida ne’e, maibé dekanu [Eurico Celestino dos Reis de Araújo-red] mós sempre iha relasaun di’ak ho sira”, afirma.

Diretora ne’e apresia ho esforsu estudante sira nian, liliu alumni no finalista sira ne’ebé estuda iha departamentu ne’e bainhira hahú estabelese, maske hahú ho zero maibé ikus mai konsege hetan rezultadu ne’ebé pozitivu hodi kontribui ba mídia sira iha Timor-Leste.

“Ha’u apresia tebes sira-nia atinjimentu, ami organiza programa ida ne’e (atividade amizade), atu rekolla informasaun no halo publikasaun, objetivu prinsipál mak hatene sira-nia susesu”, kongratula.

Jornalista: Rafy Belo

Editora: Rita Almeida

HUSIK IDA HATÁN