Governu Aprova Subskrisaun Adisionál Sai Membru IBRD

0
101
Foto google

DILI, (TATOLI) – Governu liuhosi reuniaun Konsellu Ministru (KM) aprova proposta rezolusaun governu ne’ebé aprezenta husi Ministru Planu no Finansa, Rui Gomes, kona-ba subskrisaun adisionál atu Timor-Leste sai membru Banku Internasionál ba Rekonstrusaun no Dezenvolvimentu (IBRD-International Bank for Reconstruction and Development).

“Reuniaun Konsellu Ministru ohin Governu aprova proposta rezolusaun governu husi Ministériu Planu no Finansa, aprezenta husi Ministru Rui Gomes ne’ebé ko’alia kona-ba subskrisaun adisionál adezaun Timor-Leste ba konsellu administrasaun Banku Internasionál ba Rekonstrusaun no Dezenvolvimentu ne’ebé sai parte grupu Banku Mundiál nian”, tenik Sekretáriu Estadu Konsellu Ministru no Komunikasaun Sosiál, Matias Boavida, ba jornalista sira hafoin reuniaun KM iha Palásiu Governu, ohin.

Hodi hatutan ne’e hanesan kuota ne’ebé tenke kumpri tanba Timor-Leste sei hola parte iha konsellu administrasaun grupu ne’e rasik.

“Ita tenke kumpri kuota ne’e ba konsellu administrasaun Banku Internasionál ba Rekonstrusaun no Dezenvolvimentu hanesan parte husi parte grupu Banku Mundiál nian”, katak.

Entretantu, IBRD hanesan banku dezenvolvimentu boot iha mundu ne’ebé fó produtu finansiál no informasaun atu ajuda nasaun membru sira reduz kiak no hetan benifísiu sustentável ba komunidade.

Banku ne’ebé iha ona membru 189 ne’e hodi suporta grupu Banku Mundiál atu fornese impréstimu, produtu no servisu ba nasaun membru sira no halo koordenasaun atu hatan ba dezafíus rejionál no globál.

Jornalista: Julia Chatarina

Editora: Rita Almeida

HUSIK IDA HATÁN