FM Seidauk Bele Fó Konsekuénsia Pozitiva Finanseiru ba TL

0
311
Ministru Estadu Konsellu Seguransa no Defeza, Dr. José Ramos Horta. Imajen Mídia Palásiu PR.

DILI, (TATOLI) – Ministru Estadu Konseleiru ba Seguransa Nasionál, José Manuel Ramos Horta, hateten bainhira seidauk hetan solusaun ba dezenvolvimentu Greater Sunrise, bele iha fronteira marítima (FM) maibé seidauk bele fó konsekuénsia pozitiva komersiál finanseiru ba Timor-Leste (TL).

“Akordu ne’e seidauk kompletu tanba seidauk rezolve prosesu dezenvolvimentu esplorasaun komersiál Greater Sunrise”, Eis Prezidente Repúblika hato’o ba jornalista sira iha Palásiu Prezidente Nicolau Lobato, Bairru Pité, kuarta ne’e hafoin jornalista sira husu ninia opiniaun kona-ba Governu TL no Austrália asina ona akordu ba delimitasaun fronteira marítima.

Horta tenik Governu hein esplikasaun hosi Ministru Adjuntu Primeiru Ministru, Agio Pereira, katak tanbasá hetan ona akordu fronteira marítima maibé seidauk akordu ba dezenvolvimentu Greater Sunrise.

Nia hatutan Governu sei apoiu nafatin ba ekipa negosiadór ne’ebé lidera hosi Kay-Rala Xanana Gusmão atu hetan dalan ne’ebé di’ak liu-ba Timor-Leste. “Governu kontinua apoia Señor Xanana Gusmão nia mandatu nu’udar xefe negosiadór para kontinua esforsu buka solusaun ba dezenvolvimentu Greater Sunrise”.

Iha biban ne’e, Horta hato’o parabéns ba ekipa negosiadór hosi Timor-Leste no Ministru Adjuntu Primeiru Ministru, Agio Pereira, ne’ebé asina ona akordu.

“Parabens ba Señor Xanana Gusmão tanba iha vizaun no korajen hetan akordu ba fronteira marítima permanente”, hato’o.

Jornalista: Xisto Freitas

Editora: Rita Almeida

HUSIK IDA HATÁN