Estrada Husi Ponte Bidau To’o Kruzamentu HNGV Sei Halo Sentidu Úniku

0
242
Avizu ne’ebé fó sai husi DNTT. Foto/Facebook DNTT.

DILI, (TATOLI) – Diresaun Nasionál Transporte no Terrestre (DNTT) fó sai ona avizu ba públiku katak estrada públiku husi kruzamentu ponte Bidau Santa Ana (tasi-ibun) mai to’o iha kruzamentu Ospitál Nasionál Guido Valadares (HNGV-sigla iha portugés) nian sei halo sentidu úniku (satu arah) tanba iha estrada ne’e kria engarrafamentu maka’as.

Diretór Nasionál Transporte no Terrestre, Natalino do Rosário, hatete tuir observasaun DNTT nia fatin refere hamosu konjestionamentu (macet) nune’e tempu to’o ona atu minimiza kestaun ida ne’e.

“Foin mak fó sai avizu ba públiku tanba ita atu hala’o sentidu úniku tenke fó lai avizu ba ita-nia komunidade sira ne’ebé mak uza estrada públiku ne’e atu sira bele hatene antes ita ezekuta”, Natalino hatete iha Balide, ohin.

Sentidu úniku husi Rua de Martinho Lopes, kruzamentu ponte Bidau Santa Ana to’o iha kruzamentu HNGV ida ne’e sei hala’o iha 26 marsu ba oin tanba antes implementa DNTT tenke prepara fasilidade ne’ebé presiza.

“Maluk sira ne’ebé mai husi parte Kuluhun nian ou husi Ospitál Nasionál nian, sira husi ne’ebá mai labele fila bá liman loos. Ezemplu husi Kuluhun mai sira labele kontinua, tenke tau sinál bandu atu tama iha ne’ebá pois tau sinál para sira atu filafali bá liman loos nian”.

“La’ós ida ne’e de’it, maibé estrada husi Paulus nia sa’e mai depois restaurante ida Bambu Kuning nia sa’e mai nia labele fila bá liman-karuk, tanba ne’e mak antes ne’e ami tenke fó aviza tanba ami mós sei prepara ba fasilidade sira ne’e”.

Kona-ba data implementasaun ne’e fiksu ona no fasilidade estrada nian mós kompleta ona hein atu instala depois to’o loron ne’ebé determina ne’e komesa hala’o de’it.

Bainhira implementa ona maka DNTT sei tau funsionáriu sira iha fatin ne’e durante semana ida liuliu iha kruzamentu ONGV para fó hatene utilizadór estrada.

Aleinde ne’e sei haree mós estrada husi Hudi-Laran mai to’o kruzamentu Bairru Pité nian, tanba ne’e DNTT halo hela koordenasaun ho Polísia Tránzitu nian atu nune’e iha tempu badak sei halo mós sentidu úniku.

“Primeiru, ami sei halo survey maizumenus fasilidade estrada ida ne’ebé mak presiza, sinál saída mak ita presiza tau iha ne’ebá, tanba ne’e mak ha’u fó orientasaun ba iha departamentu tráfiku terminál ninian para haree, nune’e mós halo koordenasaun ho Polísia Tránzitu nian para ami bele prepara ona fasilidade sinál sira ne’e, kompletu ona ami bele fó sai avizu para ami bele determina ona data para bele ezekuta mós ida ne’e”.

Jornalista: Maria Auxiliadora

Editora: Rita Almeida

HUSIK IDA HATÁN