Espoza PR Husu Polisia Feminina Garante Páz

0
29
Espoza Prezidente Repúblika (PR), Cidalia Guterres, foto hamutuk ho nia feto maluk hosi instituisaun PNTL no seluktan. Foto midia PR

DILI, (TATOLI) – Espoza Prezidente Repúblika (PR), Cidalia Guterres, husu ba polísia feto atu garante páz no estabilidade iha Timor-Leste.

“Ha’u husu eh enkoraja polísia feminina eh feto hodi garante páz no estabilidade hanesan forsa seguransa iha nasaun ne’e”, Espoza PR, Cidalia Guterres, nia intervensaun iha workhsop relasiona ho loron mundiál feto ne’ebé sei monu iha 8 marsu, serimónia ne’e realiza iha Ótel Tower Fatuhada, tersa (6/3).

Tanba ne’e, kontribuisaun feto ba dezenvolvimentu iha prosesu hotu iha instituisaun Estadu importante, liliu iha instituisaun Polísia Nasionál Timor-Leste (PNTL), nune’e prosesu dezenvolvimentu instituisaun seguransa, feto mós hola parte tanba esperiénsia luta iha tempu okupasaun sira kontribui maka’as mezmu iha violasaun seksuál, atan ba seksuál, torturasaun fízika no seluktán.

Maibé feto nia responsabilidade mak garante estabilidade no páz nu’udar parte integrada iha sosiedade.

Responsabilidade ne’e la’os tanba kaer kargu eh pozisaun maibé mak simu konsekuénsia tomak iha sosiedade laran.

Nune’e, iha prosesu harii páz no estabilidade feto nia kontribuisaun signifikante tebes no feto tenke sai ajente ba páz.

Enkuantu, totál polísia feminina hamutuk 625 tanba ne’e presiza aumenta tan feto PNTL tanba realmente komandante munisípiu sira maioria mane maibé espera katak formasun hirak ne’ebé iha bele forma oinsá polísia feminina bele foti desizaun no bele aumenta númeru.

Parte seluk, Komandante Jerál PNTL, Julio Hornay, hatutan feto importante tebes iha sosiedade, kuandu la iha feto, mane la kontente.

Feto nu’udar konseleiru di’ak iha mane nia sorin tanba feto fó nafatin hanoin di’ak ba mane sira kuandu desizaun ruma ne’ebé la loos.

Feto ho mane iha instituisaun PNTL hanesan, la iha diskriminasaun ba kargu xefia ruma mezmu mane mak maioria hodi asume pozisaun bo’ot tanba liuhosi prosesu hotu, ezemplu kiik mak kuandu haruka sira treinu mós iis la di’ak no seluktán.

Jornalista: Zezito Silva

Editora: Rita Almeida

HUSIK IDA HATÁN