Empreza Star Product Rekolla Lixu Iha Vikeke

0
77
Foto google.

DILI, (TATOLI) – Empreza Star Product ne’ebé mak hetan ajuda husi Governu atu harii indústria resiklajen iha Timor-Leste tanba iha kompromisu atu halo jestaun ba lixu, daudaun ne’e rekolla lixu iha munisípiu Vikeke nian.

Empreza ne’ebé hetan ajuda fundu transferénsia públiku husi Ministériu Komérsiu no Indústria (MKI) iha Sestu Governu Konstitusionál ho montante mil U$289 atu kontribui ba ambiente tanba Timor-Leste seidauk iha solusaun ne’ebé apropriadu ba tratamentu lixu.

Diretór Kompañia Star Product Lda, José Deolindo Ximenes, hatete atividade rekolla lixu ne’e halo iha Vikeke tanba administradór munisípiu mak oferese fatin nomós empreza koopera ho Japaun hodi halibur plástiku sira iha munsípiu refere.

“Ami rekolla aluminiun, plástiku, no buat sira ne’ebé halai ba lixu nian. Iha Vikeke ne’e ema kolabora di’ak no sasán sira ne’e la soe arbiru iha vila-laran tanba buat ida plástiku ne’e sira rekolla maka’as no iha fulan kotuk halo uma boot ida atu halibur sasán sira ne’e”, José hatete via telemovel, ohin.

Bainhira atividade ne’e la’o ona no instala mákina sira hotu ona maka iha munisípiu 13 ne’e sei tau agen ruma atubele rekolla plástiku iha sidade laran.

“Tuir ha’u-nia haree dezde tempu UNTAET to’o mai agora volume (lixu) ne’ebé boot liu mak iha Dili, ne’ebé ha’u iha planu ida atu serbisu hamutuk ho saneamentu munisípiu Dili atu haree lixu fatin ne’ebé aloka iha sidade laran ne’e ho Meiu Ambiente para haree loloos oinsá aloka lixu fatin para labele akontese agora daudaun, lixu soe arbiru tanba ita-nia ema sira laiha konsiénsia, maibé ita atu buka mekanizmu oinsá para regula buat ne’e tuir nia fatin”.

Enkuantu empreza ne’ebé halo ona lansamentu fatuk dahuluk husi eis Ministru Indústria, Komérsiu no Ambiente, Constâncio Pinto, iha Lesibutak, Manleuana iha agostu 2017 ne’e paradu tanba problema kona-ba rai, nune’e muda fali atividade bá Vikeke.

“Iha Vikeke komunidade mak halibur lixu depois kompañia sosa. Tanba ita konta ba transporte, depois ita prosesa filafali lixu ne’e entaun ita borong de’it, iha saku boot semente ne’e ita fó dólar 2 ba sira. Iha munsípiu 13 ne’e ha’u iha planu atu implementa buat ida ne’e tanba serbisu ida ne’e mak la’o duni entaun futuru plástiku husi Kupang, Atambua sei tama tan fali mai iha Timór tanba ita halo kadeira, gayung no basia”.

Deolindo hatutan volume lixu entermu plástiku, Dili iha loron ida prodús tonelada 50. Maski nune’e atividade atu halo produsaun ba lixu ne’e seidauk bele la’o tanba fatin atu harii indústria resiklajen ne’e iha hela problema, nune’e husi parte Ministériu Komérsiu no Indústria mós kontinua haree no ko’alia mós ho Terras no Propriedade atu aselera prosesu ne’e tanba seidauk iha desizaun husi terras.

Makína ba produsaun lixu nian daudaun iha ona, maibé seidauk bele halo produsaun tanba fatin atu tau mákina seidauk iha, maibé kompañia mós buka hela fatin atubele instala mákina ba produsaun kadeira nian.

Iha vizita Ministru Adjutu Primeiru-Ministru, José Reis, ba kompañia foin lalais ne’e, diretór kompañia hato’o problema kona-ba rai, nune’e ministru responde katak tanba empreza ne’e iha relasaun ho ambintál maka iha tempu badak sei informa ba Vise-Ministru Dezenvolvimentu ba Abitasaun, Ordenamentu no Ambiente atubele haree serbisu husi kompañia nian nomós sei ko’alia mós ho parte TradeInvest atu haree kona-ba situasaun ne’ebé hasoru.

Jornalista: Maria Auxiliadora

Editora: Rita Almeida

HUSIK IDA HATÁN