Em Nome Taur-Naimori, Xanana Agradese Grupu Rezisténsia

0
483
Xanana Gusmão hamriik ho inan feton na’in rua iha kampaíña. Foto Tatoli/Antonio Gonçalves.

DILI (TATOLI)—Prezidente Partidu Kongresu Rekonstrusaun Timor-Leste (CNRT-sigla Portugés) Kay Rala Xanana Gusmão lori nia an no lori Taur Matan Ruak, ho Naimori fó agradese ba grupu rezisténsia ne’ebé deklara ona atu apoiu AMP hodi hetan vitória iha Eleisaun Antisipada (EA).

“Ha’u agradese ba imi. Em nome sira na’in rua mós. Imi hotu nia prezensa iha ne’e. sira agradese maibé sira hameno mai ha’u katak labele promete barak liu ba imi,” Kay Rala Xanana Gusmão fó sai iha nia intervensaun iha Diálogu ho Forsa Polítika Sira Ne’ebé Apoia AMP, iha Salão Katedrál, Sábadu (24/03).

Xanana hatutan, Eleisaun Antisipada, AMP tenke manan. Manan, atu hadi’a estadu ne’e. estadu tenke iha estabilidade governativa, no defende Timor-Leste nia riku soin.

“Bainhira la manan, pergunta Timor mak laserve ukun an, ou ita mak la serve,” Xanana Gusmão husu. Hodi dehan tan, iha realizasaun eleisaun fiskais sira tenke atensaun didi’ak tanba bele mosu Sulap (masonik).

Bainhira AMP manan, AMP defende forte atu dada kadoras Great Sunrice mai Timor-Leste. Nune’e Timor kompleta independénsia ekonomia Timor-leste nian, enkuantu independénsia polítika Timor alkansa ona.

Kona ba arte marsiais, bainhira AMP manan, sei halo kontratu ho kada organizasaun arte martisiais atu asegura estabilidade iha Timor-Leste. Uluk hamosu lei taka tanba atu hadi’a mentalidade no karater ne’ebé hanoin de’it kria problema e la iha kapasidade kontrola an.

“Ha’u agradese imi nia fiar. Ha’u lakohi imi vota ba ha’u atu sai Primeiru Ministru, maibé se imi fila ho hanoin ida katak vota AMP tenke manan atu hadi’a estadu, ida ne’e mak loos. Fila tenke mobiliza malu katak ita tenke hametin estadu, dalan mak vota ba AMP iha eleisaun EA,” Xanana hameno.

Entertantu Grupu sira hanesan; Santo António, 12 Novembru lidera hosi Abesi, PSHT, Eis Falintíl, eis petisionáriu, sete-sete, cinco-cinco, Juventude loriku Movimentu, Kolimau, Fitun, THS-THM, Kera Sakti, Bua Malus, intelektuál UNTL, Kamponeza, deklara ohin halo deklarasaun konjuntu hodi apoiu Kay Rala Xanana Gusmão ho Taur Matan Ruak, no Naimori hodi hetan vitória iha Eleisaun Antisipada (EA).

 Jornalista : Zezito Silva

Editór : Manuel Pinto

HUSIK IDA HATÁN