Eis Governante, Diretór no Funsionáriu Rejistadu iha Ministériu Públiku

0
498
Prokuradór Jerál Repúblika (PJR), José da Costa Ximenes.

DILI, (TATOLI) – Prokuradór Jerál Repúblika (PJR), José da Costa Ximenes, hateten la’ós membru Governu (eis governante) de’it maka komete kazu Korupsaun, Koluzaun no Nepotizmu (KKN) maibé mós diretór no funsionáriu balun.

“Sira (eis governante, diretór no funsionáriu) ne’ebé rejistadu ona iha Ministériu Públiku, balun sai hanesan testemuñu, balun sai arguidu, balun akuzadu ona hein julgamentu iha tribunál, balun ita arkiva sira nia prosesu”, hato’o José Ximenes ba jornalista sira iha Palásiu Prezidente Nicolau Lobato, Bairru Pité, segunda ne’e.

Nia dehan sei la temi ema hirak ne’e nia naran ba públiku tanba prosesu ne’ebé submete ba investigasaun, sei iha faze segredu justisa.

“Ministériu Públiku iha kna’ar ida mós atu asegura estatutu sosiál tanba Konstituisaun Repúblika dehan ema hotu iha lei nia oin hanesan”, tenik.

Krime korupsaun ne’e, Ximenes realsa akontese iha Funsaun Públika nia ezersísiu, tanba ne’e sira ne’ebé tuir konsertu funsionáriu públiku ne’e bainhira halo sala iha hala’o funsaun, sira hatene ninia konsekuénsia.

Jornalista: Xisto Freitas

Editora: Rita Almeida

HUSIK IDA HATÁN