Duodésimu Marsu Sa’e Porsentu Rua Husi Totál Orsamentu Hamutuk U$104.6

0
213
Edifísiu MPF. Foto/MPF.

DILI, (TATOLI) – Dotasaun Orsamentu Temporáriu (DOT) ka duodésimu iha fulan-marsu sa’e porsentu rua husi totál orsamentu hamutuk millaun $104.6 kompara ho DOT fevereiru nian.

Tuir komunikadu ne’ebé ajénsia TATOLI asesu ohin katak kreximentu ne’e relasiona ho kontinuasaun prevé despeza ba atividade eleisaun ne’ebé liuhusi prosesu aprovizionamentu, servisu legál no eis titulár sira, inklui aumentu kustu ba Rejiaun Autónoma Espesiál Oekusi Ambeno (RAEOA)-Zona Espesiál Ekonómiku Sosiál Merkadu (ZEESM), Komunidade Nasaun sira ne’ebé ko’alia lian portugés (CPLP-sigla portugés), infraestrutura rurál, pagamentu kuota no re-pagamentu empréstimu.

“Durante ne’e alokasaun Dotasaun Orsamentu Temporáriu husi períodu janeiru to’o marsu seidauk liu tetu Dotasaun Orsamentu Temporáriu, maski iha kreximentu husi períodu ida ba períodu seluk, maibé nafatin kumpri ba desizaun Konsellu Ministru katak kalkulasaun Dotasaun Orsamental Temporaria limita de’it ba kategoria haat mak hanesan saláriu no vensimentu, bens no servisu, kapitál dezenvolvimentu no transferénsia públika”, refere komunikadu.

Tuir ezekusaun DOT iha períodu rua antes ne’e entre janeiru no fevereiru, iha fulan kotuk hatudu dezempeñu di’ak liu duké janeiru no hein katak iha implementasaun DOT tuirmai bele mantein no hatudu dezempeñu di’ak liu períodu rua ne’ebé liu ona.

Ministériu Planu no Finansas (MPF) louva ezekusaun DOT durante períodu rua liu ba, la’o ho dixiplina no transparénsia.

Nune’e MPF husu ba instituisaun Estadu sira atu kumpri nafatin prinsípiu sira ne’ebé hatuur ona ba implementasaun DOT mak hanesan dotasaun orsamentál kobre de’it despeza ida durante períodu laliu fulan ida no dotasaun orsamentál labele liu um doze avos (1/12) husi orsamentál ne’ebé define tiha ona tuir lei Orsamentu Jerál Esatdu númeru 13/2016 ne’ebé mak tama en-vigór, tuir artigu 31 husi Lei Orsamentu no Jestaun Finanseira númeru 13/2009.

Iha loron 1 fulan-marsu ne’e, MPF liuhusi Diresaun Jerál Finansa Estadu hahú ona distribui utilizasaun DOT marsu nian ba liña ministeriál, instituisaun Estadu no Ajénsia Autónoma sira bazea ba artigu 31 husi lei númeru 13/2009 hodi bele implementa ho rigór no transparénsia.

 Jornalista: Maria Auxiliadora

Editora: Rita Almeida

Ezekusaun DOT 66% Ekivale Millaun 66.7

HUSIK IDA HATÁN