Doutór Espesiál Singapura Hakarak Kapasita Timoroan Iha Área Kardiolojia

0
44
Foto google

DILI, (TATOLI) – Doutór espesialista hosi ospitál públiku Singapura iha interese atu fó formasaun ba médiku timoroan iha área espesialista kardiolojia no kankru hodi hamenus númeru  tranferénsia pasiente ba ospitál refere.

Primeiru-Ministru, Mari Alkatiri, hateten hafoin enkontru ho ekipa doutór espesialista hosi Singapura ne’ebé lidera hosi doutór espesialista, Chua Yeow Leng, iha Palásiu Governu, ohin.

ʺSira mai iha ne’e atu define área koperasaun para fó treinu ba ita nia ema hodi harii kondisaun iha ita nia setór saúde, liliu iha ospitál Guido Valadares ho ospitál seluktánʺ, dehan Xefe Governu.

Durante tinan barak ona, ospitál nasionál tenke halo tranferénsia pasiente ho moras fuan, kankru no seluktán ba ospitál sira iha rai liur tanba laiha rekursu doutór espesialista iha área hirak ne’e.

Xefe Ezekutivu ne’e hateten tenke kria ona kondisaun, liliu prepara timoroan sira hodi hamenus gastu orsamentu ba tranferénsia moras iha rai liur.

ʺTenke iha ona kondisaun para ita nia profisionais saúde sira bele aumenta sira nia kapasidade no koñesementu iha área espesialidadeʺ, tenik.

Jornalista: Agapito dos Santos

Editora: Rita Almeida

HUSIK IDA HATÁN