Dezenvolve Turizmu ho Rekursu Timor Lori Dezenvolvimentu

0
157
Turizmu Timor-Leste. Foto espesiál

DILI, (TATOLI) – Peskizadór no alumni UNILAB (Universidade da Integração Internacional da Lusofonia AfroBrasileira) konsidera turizmu Timor-Leste (TL) nu’udar atividade ida ne’ebé bele lori dezenvolvimentu ba timoroan sira, maibé ho rekursu timoroan sira nian rasik.

“Turizmu ba Timor-Leste la simplesmente nu’udar meiu kresimentu ba nasaun, maibé atividade ne’e lori dezenvolvimentu ba timoroan sira ho rekursu rasik no la’ós liuhusi investimentu estranjeiru sira”, akresenta reprezentante peskizadór sira, Mario Marçal, liuhusi komunikadu mai TATOLI, ohin.

Nia mós akresenta dalan ne’ebé mak timoroan sira bele halo iha dezenvolvimentu turizmu mak jerasaun empregu no renda, inkluzaun sosiál, komunidade lokál sira nu’udar jestór turizmu, presiza kuidadu meiu-ambiente, kualidade moris timoroan sira nian, iha perspetiva ida ne’ebé sustentável no prezervasaun istórika kulturál.

“Tanba ne’e, peskiza ida ne’e iha relevánsia mak estrema ba Timor-Leste hodi kontribui ba foti desizaun iha programa, planu no polítika estadu nian”, realsa.

Nia mós esplika turizmu nu’udar atividade ne’ebé ema mak hala’o, durante viajen husi fatin ida ba fatin seluk, husi fatin sira ne’ebé mak diferente, iha ne’ebé la’ós sira-nia retornu abituál iha périodu mínimu oras 24 no másimu tinan ida.

Turizmu integra servisu sira hanesan ospedajen, entretenimentu, movimentasaun kulturál no atendimentu adekuadu ba vizitante sira.

Timor-Leste nu’udar Nasain sudeste aziátiku ne’ebé mak sai indepedente iha 2002, hafoin nasaun sira oioin okupa no sai.

Dezenvolvimentu ba Timor-Leste iha relevánsia ho sosiedade lokál, nune’e kria ona Planu Estratéjiku Dezenvolvimentu (PED), 2011 to’o 2030 ne’ebé mak estabelese meta sira, nune’e estadu timorense bele atinji.

Tuir peskizadór sira, TL iha potensialidade ho rekursu naturál, planu ne’ebé mak enfatiza ba dezenvolvimentu turizmu.

Problema sira detektadu bainhira hanoin iha polítika turizmu, alende hamosu fatin serbisu no renda ba ema sira. Bele lori dano eh estragu ba komunidade lokál no meiu-ambiente sira ne’ebé mak haleu.

“Objetivu husi peskiza ida ne’e mak analiza polítika turizmu projetada iha PED no oinsá nia implementasaun, halo krítika kona-ba planu sira no aponta diresaun balun hodi hadi’a polítika turizmu Timor-Leste nian”, refere peskizadór.

Entretantu, peskizadór sira ne’e, alende Mario Marçal, inklui mós Jucelina Maria da Cruz no Filipa da Costa Pinto.

Peskiza ne’e rasik sira hala’o ho tema O Turismo Para o Desenvolvimento Local em Timor-Leste.

Tipu analiza ba peskiza ida ne’e bibliográfika dokumentál kona-ba diskusaun dezenvolvimentu sira alende kresimentu fundamentasaun teórika polítika turizmu. Ideia prinsipál ba analíze ne’e nu’udar estudu kazu (planu no polítika projetada iha PED), ho ezamina turizmu, meta projetada no oinsá ezekusaun programa.

Notísia relevante, http://www.tatoli.tl/2017/07/mundu-turistiku-presiza-atensaun-buat-lima/Seluk mak, http://www.tatoli.tl/2017/07/area-turizmu-presiza-inisia-ho-merkadu/

Jornalista: Rafy Belo

Editora: Rita Almeida

HUSIK IDA HATÁN