KS-UNTL Planea Koordena ho Rede Telekomunikasaun Sira

0
129
Diretora no vise-diretora CS, UNTL. Foto FB: Eujevio Pereira

DILI, (TATOLI) – Lider eleitu departamentu Komunikasaun Sosiál eleje husi Universidade Nasionál Timor Lorosa’e (UNTL), Dwikori Sitaresmi, nu’udar diretora no Dulce Martins nu’udar vise sei preokupa ho rede telekomunikasaun iha departamentu hodi fasilita estudante sira hodi estuda di’ak liután kona-ba multimedia.

Multimedia importante no avansadu tebes no ohin loron evolusaun lais tebes maibé internet sei sai problema ida. Tan ne’e, departametu sei buka meius koopera ho rede telekomunikasaun sira balun ne’ebé opera iha Timor-Leste hanesan TT (Timor Telekom), Telkomcel no Telemor.

“Ami, hamutuk ho profesór no estrutura tomak CS nian planea halo koneksaun ho empreza telekomunikasaun sira iha Timor-Leste hodi fasilita liña internet ba departamentu hodi fasilita estudante sira”, dehan vise-diretora, Dulce Martins, perante estudante sira iha Kampus Kaikoli, ohin.

Profesora ne’e akresenta departamentu CS ne’ebé agora sira lidera nota katak estudante barak animu tebes hodi aprende no barak sai vensedór ba prémiu ho kategória oi-oin, iha nível multimedia hanesan produsaun filme no reportajen badak, fotografia no seluk tan, tanba ne’e sei buka atu koopera ho mídia sira hodi bele publika produtu estudante CS nian.

Kompetisaun sira ne’ebé mak estudante CS sira kompete no sai vensedór mak hanesan kompetisaun filmajen badak organiza husi PHD (Partner For Human Development) Austrália 2017, kompetisaun filme badak, lokutór rádiu TLMDC (Timor-Leste Media Development Center).

Tuir mai, manan na’in kona-ba kompetisaun foto kona-ba Juventude no Objetivu Dezenvolvimentu Sustentável (ODS) iha 2015, manan na’in kona-ba kompetisaun foto “Human Behind the Camera”, organiza husi Telkomcel iha 2017.

Seluk mak manan na’in ba kompetisaun “Dili Photographer Comunity” nomós dala idatán kona-ba lokutór no filme badak TLMDC nian iha 2016.

“Laboratóriu CS iha ona , estudante CS sira iha ánimu hodi halo produsaun maibé la iha fatin atu espresa tan ne’e departamentu sei koordena ho mídia sira, hanesan Mídia Edukasaun, TVTL (Televizaun Timor-Leste) no seluk tan atu estudante sira bele espresa,” garante vise-diretora ne’e.

Iha fatin hanesan, Diretora Dwikori Sitaresmi promote katak sei serbí estudante sira ho domin no fuan.

Nune’e mós agradese ba universidade, fakuldade no entidade relevante hodi fó oportunidade ba sira hodi lidera departamentu ne’e maske sira mesak feto.

Nia mós agradese ba apoiu estudante, alumni no finalista CS nian tan durante ne’e apoiu ona departamentu hodi fasilita atividade oioin hodi promove departamentu ne’e inklui atividade ekstrakurikulár sira seluk tan maske iha sei iha dezafiu.

Entretantu estudante CS foun tinan létivu ne’e inskritu hamutuk  estudante na’in 157.

Jornalista: Rafy Belo

Editora: Rita Almeida

HUSIK IDA HATÁN