CS-UNTL Komemora Vitória ho Amizade

0
68
Serimómia agradesementu KS-UNTL. Foto FB: Eujevio Pereira

DILI, (TATOLI) – Universidade Nasionál Timor Lorosa’e (UNTL), Fakuldade Siénsia Sosiál (FSS), liliu Departamentu Komunikasaun Sosiál (KS) organiza atividade agradesimentu iha kampus Kaikoli, sábadu ne’e ho amizade.

Atividade ne’e organiza ho intensaun hodi komemora vitória estudante KS nian, hametin amizade no fraternidade entre estudante sira, alumni, finalista no estudante ativu ho estudante foun na’in 157 ne’ebé inskreve iha tinan létivu 2018, benvindu ba dosente KS, Dulce Martins, tanba hakotu estudu iha Japaun, Roberto Pacheco hakotu estudu iha Portugal nomós kongratula lider foun KS, Dominika Dwikori nu’udar diretora no Dulce Martins nu’udar vise-diretora.

Produtu KS ne’ebé hetan vensedór eh manan na’in hodi hatudu prestasaun akadémika iha eventu nasionál sira, organiza husi entidade sira seluk envolve estudante KS sira ne’ebé departamentu apresia liuhusi atividade amizade (bina-akrab), mak manan na’in kompetisaun filmajen badak iha PHD-Austrália 2017 primeiru lugar mak estudante, Ludovino dos Santos.

Segundu lugar, estudante Hermenegildo Maia Oliveira no terseiru lugar mak estudante Bernardo Corte Real.

Tuir mai, manan na’in ba kompetisaun kona-ba filmajen badak, lokutór rádiu no filme badak TLMDC (Timor Leste Media Development Center)-Rádiu Rakambia DCS-SEKOMS (Sekretáriu Estadu Komunikasaun Sosiál), 2016, mak estudante Candido Alves, terseiru lugar. Nune’e mós ba estudante Dilijanto F. Viana Xavier, segundu lugar.

Inklui, manan na’in ba kompetisaun fotografia kona-ba, “Human Behind the Camera” TeleKomcel, 2017 mak estudante Iriana Domina Soares, terseiru lugar.

Manan na’in ba kompetisaun fotografia (ONU-Organizasaun Nasaun Unida), “Juventude no Objetivu Dezenvolvimentu Sustentável”, 2015 mak estudante Eugenio Pereira da Silva.

Manan na’in ba kompetisaun fotografia: “Dili Photographer Comunity” mak estudante Verónica de Oliveira Ximenes.

Prestasaun ne’ebé estudante sira atinji hodi reprezenta departamentu KS hodi hatudu ba públiku kona-ba kualidade estudante UNTL nian nu’udar motivasaun no korajen ba estudante sira seluk no iha futuru.

“Ne’e hanesan motivasaun ba estudante sira seluk iha futuru, atu bele hetan mós rezultadu sira hanesan ne’e”, dehan diretora departamentu KS, Dwikori Sitaresmi hodi enkoraja estudante sira.

Reprezentante vensedór sira, Ludovino dos Santos, akresenta maske hetan difikuldade maibé tan vontade no komprímisu mak bele atinji rezultadu pozitivu iha kompetisaun.

“Susesu ne’e mai husi prosesu rua; primeiru mak prepara aan, katak prepara iha tempu no kada minute ne’ebé mak iha. Tuir mai kapasidade no oportunidade”, manan na’in kompetisaun filmajen badak 2017 mak, primeiru lugar, estudante Ludovino dos Santos fó mensajen ba estudante sira.

Kona-ba atividade amizade (bina akrab) nian ne’ebé hala’o de’it iha kampus tanba tempu Kuarezma.

Tuir observasaun TATOLI atividade ne’e ánimu no amigável tebes tanba hetan partipasaun husi estudante sira, hahú husi estudante 2008 (alumni sira) to’o 2018.

Atividade ne’e rasik hetan partisipasaun husi Sekretáriu Estadu Komunikasaun Sosiál, Matias Boavida nomós konvidadu sira seluk.

Jornalista: Rafy Belo

Editora: Rita Almeida

HUSIK IDA HATÁN