CNE Husu ParPol Halo Klarifikasaun ba Irregularidade Durante Konsolidasaun

0
131
Prezidente CNE, Alcino Barrís, halo konferénsia imprensa hafoin hala'o sorumutuk ho Partidu Polítiku (ParPol) no koligasaun partidária sira kona-ba regra kampaña eleitorál. Foto Tatoli/Egas Cristovão

DILI, (TATOLI) – Iha Sorumutuk ho Partidu Polítiku (ParPol) no koligasaun partidária sira kona-ba regra kampaña eleitorál, Prezidente Komisaun Nasionál ba Eleisaun (CNE-sigla portugés), Alcino Barrís, husu atu halo klarifikasaun kona-ba irregularidade.

“Sira rasik dehan katak sei la-halo propaganda eleitorál enkuantu seidauk to’o tempu maibé saida mak sira halo hodi informasaun ne’e espalla iha mídia sosiál, sira rekoñese katak hahalok ne’e iha faze konsolidasaun ne’ebé sira halo ho sira ninia apoiante no militante iha sede partidu”, tenik Alcino iha konferénsia imprensa hafoin sorumutuk iha salaun CNE, ohin.

Alcino Barris haktuir konstentasaun ne’ebé CNE simu husi partidu FRETILIN hasoru Aliansa Mudansa ba Progresu (AMP) ne’ebé kompostu husi CNRT, PLP no KHUNTO katak oras ne’e dadauk halo ona kampaña eleitorál ka propaganda eleitorál ba públiku.

“Konfirmasaun ne’ebé halo durante enkontru iha justifikasaun husi AMP katak sira halo konsolidasaun iha sede ba militante no apoiante sira”, katak.

Nune’e nia hatutan oras ne’e dadauk CNE rona klarifikasaun husi ParPol sira maibé se-karik ba oin mak iha indikasaun ruma, hanesan la’os iha sede ka fatin ne’ebé destinadu, CNE sei haruka investigasaun atu hatudu verdade.

Alende ne’e, CNE ohin informa ba ParPol sira labele uza lai atributu kampaña tanba seidauk tama periúdu kampaña eleitorál. Informasaun ne’e ho razaun hetan koligasaun partidária Frente Dezenvolvimentu Demokrátiku (FDD) hahú taka stiker iha sinais tránzitu Manufahi.

“Iha sira nia defeza, FDD dehan ema mak uza sira ninia atributu la’ós sira, tanba konsiente hela katak seidauk to’o iha momentu atu alo propaganda eleitorál. Tanba ne’e sira dehan katak hahalok iha ne’eba la’ós reprezenta sira nia partidu”, dehan tan.

Ho sorumutuk ne’e, Alcino haktuir ParPol sira nia reasaun ba CNE nia orientasaun di’ak tebes tanba hakarak koopera no tenta atu minimiza irregularidade durante prosesu hotu.

Nune’e, nia informa iha tempu badak CNE sei konvoka fali ParPol sira atu revee sira nia atetude durante prosesu ne’e, alende ne’e  bele ezije nafatin ba sira atu tama iha koridor ne’ebé ema hotu hakarak prosedimentu ne’ebé mak vigor.

Jornalista: Julia Chatarina

Editora: Rita Almeida

HUSIK IDA HATÁN