CMATS Lori Ratifikasaun Parlamentu Australianu Ba Esplorasaun Bayu Undan

0
270
Primeiru-Ministru, Mari Alkatiri no eis gerilleru, Taur Matan Ruak, iha seminariu ba selebrasaun loron veteranu nasional iha sentru konvensaun Dili. Foto Egas Cristovao

DILI (TATOLI) – Primeiru-Ministru, Marí Alkatiri, hateten bainhira laiha akordu Certain Maritime Arrangements in the Timor Sea (CMATS), sei laiha ratifikasaun Parlamentu Australianu ba esplorasaun Bayu Undan.

“Kuandu la asina CMATS laiha ratifikasaun Parlamentu Australianu ba esplorasaun Bayu Undan, nune’e bainhira asina CMATS ohin, aban kedan sira ratifika no ha’u dehan prontu ida ne’e mak ha’u nia hakarak”, tenik bainhira sai oradór iha konferénsia atu selebra loron nasionál ba veteranu sira iha Sentru Konvensaun Dili, sesta ne’e.

Hafoin ratifikasaun ne’ Xefe Governu haktuir Bayu Undan hetan kedan esplorasaun mina no gas no momentu ne’eba folin mina sa’e hela tanba ne’e hetan lukru di’ak.

Ho eksplorasaun ne’e, durante tinan 15 nia laran konsege hetan lukru billoen 30 resin dolar amerikanu ne’ebé sai fundus ba dezenvolvimentu iha rai laran.

Hodi dehan tan tinan 2002 bainhira diskuti fronteira marítima signifika dezenvolvimentu iha rai laran seidauk la’o tanba momentu ne’eba Timor-Leste foin hetan independénsia no seidauk iha osan. Tanba ne’e iha akordu CMATS no sai hanesan dalan ida ba negosiasaun fronteira marítima ba ohin loron.

Hatutan, akordu CMATS dehan sei to’o fevereiru 2013 mak Greater Sunrise seidauk halo produsaun (eksplorasaun), entaun governu rua ne’e ka ida mesak de’it bele kansela akordu no hahú prosesu foun.

“Ha’u iha konfiansa katak tinan 2013 sei laiha esplorasaun Greater Sunrise tanba bainhira asina akordu CMATS iha dezembru 2006, iha ha’u nia diskursu hanesan Primeiru-Ministru, dehan kedas ita nia batalla agora mak atu lori mai pipeline mai Timor-Leste”, katak.

Biar nune’e, nia dehan esforsu ne’ebé mak negosiadór prinsipál ba delimitasaun fronteira marítima, Xanana Gusmão halo ne’e importante tebes tanba agora dadauk fronteira marítima define ona, mesmu agora tenke iha akordu ho Indonézia. “Signifika luta ne’e seidauk hotu, ita tenke kontinua luta”.

Hodi akresenta, antes enkontru iha Malázia foin lais governu aprova testu akordu fronteira marítima hafoin halo deliberasaun no defende pipeline tenke mai Timor-Leste mesmu iha enkontru ne’e Parte Austrália hakarak dada ba Darwin maibé hanesan PM nia defende nafatin pipeline tenke mai Timor-Leste se la’e laiha akordu.

Iha parte seluk veteranu RaiLos agradesse ba PM tanba ho esforsu tomak bele hetan osan halo dezenvolvimentu.

“Agradese ba Primeiru-Ministru, tanba ho ninia kbi’it no matenek iha tinan 2002 osan ita laiha maibé konsege hetan osan ruma mai husi mina hodi ita goza to’o ohin loron atu halo dezenvolvimentu mesmu iha erru ruma ne’ebé presiza hadia”, dehan.

Entretantu, iha loron 20 Maiu 2002, Primeiru-Ministru governu dahuluk, Marí Alkatiri, asina Tratadu Tasi Timor ka Timor Sea Treaty ho ninia omólogu Australianu, John Howard, ne’ebé fahe rendimentu husi atividade explorasaun ba mina no gas iha area Joint Petroleum Development Area (JPDA) iha Tasi Timor ho proporsaun pursentu 90 ba Timor-Leste no pursentu 10 ba Austrália.

Husi tratadu ne’e Governu Timor-Leste no Austrália sei ratifika, nune’e bele loke dalan ba projetu explorasaun iha kampu mina no gas Bayu Undan.

Hafoin iha loron 12 Janeiru 2006 iha Sydney, Ministru Negósiu Estranjeiru, José Ramos Horta, no Ministru Negósiu Estranjeiru Australianu asina akordu CMATS akompanha husi Primeiru-Ministru, Marí Alkatiri ho ninia omólogu Austrálianu, John Howard.

Iha akordu ne’e sita hotu kona-ba kampu Greater Sunrise bainhira iha eksplorasaun parte rua sei hetan pursentu hanesan 50/50 maibé bainhira to’o tinan 2013 seidauk iha esplorasaun, governu parte desputa tenke hahú prosesu foun. Alende ne’e akordu CMATS regula fronteira marítima provizóriu Tasi Timor durante tinan 50.

Realidade to’o agora seidauk iha esplorasaun Greater Sunrise no iha loron 6 Marsu agora, Timor-Leste no Austrália sei asina akordu fronteira marítima ne’ebé parte rua aseita ona foin lais bainhira enkontru iha Malázia no sei halo negosiasaun ba Greater Sunrise.

Jornalista: Julia Chatarina

Editora: Rita Almeida

HUSIK IDA HATÁN