Boy Sabak Sei Halo Aventura Mota Hale’u Timór Durante Loron Rua

0
231
Ministru Turizmu, Manuel Vong partisipa iha konferénsia imprensa iha Sentru Informasaun Turístika, Bidau-Lesidere hamutuk ho Diretór Jerál MT, José Dias Quintas, no aventureiru timoroan, Boy Sabak.

DILI, (TATOLI) – Atu atinje alvu prisipál hale’u Timor-Leste durante oras 24 nian laran ne’ebé sei hala’o iha 17 maiu 2018, Atanásio Viana, ne’ebé familiar liu ho naran Boy Sabak sei tun bá terrenu hodi halo aventura mota durante loron rua nian laran antes to’o  ba loron ne’ebé determina ona mak fó volta Timór iha loron ida nia laran.

Atubele halo record hale’u Timór iha oras 24 maka Boy sei halo ho faze pur faze ne’ebé mak iha janeiru 2018 husi loron 3-7  hale’u ona tasi feto to’o tasi mane ho solo touring ne’ebé nia rute mak hahú husi Dili-Likisá-Maliana-Oeliu-Ojo-Alto Lebos-Maukata-Suai-Zumalai-Hatudu-Betanu-Natarbora-Vikeke-Watukarabau-Iliomar-Lospalos-Baukau-Manatutu-Dili.

Iha faze daruak nian sei hala’o iha 24-25 marsu agora ho objetivu atu kompleta nia record maka iha loron 24 sei hahú husi Dili-Manatutu-Baukau-Lospalos-Iliomar-Watukarabau-Uatulari-Vikeke. Loron tuirmai iha 24 komesa fali husi Vikeke-Natarbora-Betanu-Hatudu-Zumalai-Suai-Maukatar-Alto Lebos-Ojo-Maliana-Balibo-Batugadé-Likisá-Dili.

Boy, dezde iha 2014 iha ona inisiativa rasik no gosta halo atividade liuhusi Timor Story Adventure hanesan atividade solo touring ne’ebé fó volta Timor-Leste durante semana tolu iha marsu ho totál kilómetru 1.250 no iha setembru tinan hanesan hale’u durante loron 13 ho distánsia kilómetru 1.050 ne’ebé halo aventura hamutuk ho eventureiru Indonézia ida.

Anu tuirmai, autór ne’ebé halimar filme “Dalan Raliza Mehi” ne’e kontinua ho nia hobby ida ne’e la’o hale’u ho mota. Iha 2016 konsege halo aventura ho aventureiru internasionál na’in-hitu ne’ebé iha misaun jerál mak hale’u mundu, nune’e Atanásio aproveita oportunidade konvida sira mai Timor-Leste no halo aventura ho naran “Haree Timór ho Motór”. Aventura durante loron 13 ne’e ho distánsia hamutuk kilómetru 1.200 ne’ebé hetan suporta husi Ministériu Turizmu no parseiru seluk tan.

“Bazea ba esperiénsia durante tinan hirak nia laran, ha’u iha hakarak maka’as ida katak loron ruma ha’u hakarak fó volta Timór ne’e oras 24 ho motór no atu atinje ha’u-nia record ne’e iha fulan-maiu mai ho loron ida, maibé ha’u tenke halo pasu pur pasu (bertahap)”, Boy hatete liuhusi konfrénsia imprensa iha Sentru Informasaun Turistíka, Bidau-Lesidere, ohin, antes halo viajen mota hale’u Timór.

Tanba esperimenta ona hale’u durante loron haat iha janeiru foin lalais ne’e, Boy hakarak hatún ba loron rua. “Iha 24 agora ne’e hatún ba loron rua, objetivu prinsipál mak atubele atinje record loron ida maiu ne’e”.

Diretór Jerál Ministériu Turizmu, José Dias Quintas, hatete atividade ne’ebé halo husi Atanásio ne’e hakarak promove Timór liuhusi vajen ho motór boot.

“Agora daudaun turizmu aventura importante tebes ba Timor-Leste tanba ita-nia infraestrutura ema barak mak gosta la’o ho motór, karreta no ain-tanan ho distánsia ida naruk”.

Entaun Ministériu Turizmu fó apoiu nafatin tanba timoroan ne’e hola parte promove turizmu aventura nomós turizmu baze komunitária tanba Boy sei la’o liuhusi abitante (komunidade) nia leet no iha tempu hanesan promove mós marka turizmu Timor-Leste nian mak ne’ebé koñesidu ho “Explore The Undiscovered”.

Atividade ida ne’e hetan mós apoiu husi Delos, Sagres, Yamaha ESM, Kafé Lurón, Kafé U’ut, Black Box Coffe no LOCA.

Jornalista: Maria Auxiliadora

Editora: Rita Almeida

Notísia ne’ebé relasiona :

http://www.tatoli.tl/2018/01/atanasio-viana-hakarak-haleu-timor-ho-oras-24/

 

HUSIK IDA HATÁN