A. Berteni Fahe Esperiénsia ba Dosente Ensinu Superiór

0
231
Leitór Seniór, Dosente no Peskizadór ba Departamentu Dezenvolvimentu Komunitáriu, Fakuldade Siénsia Sosiál–UNTL, Aniceto Guro-Berteni Neves halo aprezentasaun kona-ba Introdusaun Relatóriu no Rekomendasaun Chega. Foto FB: Agbn Chega

DÍLI, (TATOLI)-Leitór Senior, Dosente no Peskizadór ba Departamentu Dezenvolvimentu Komunitáriu, Fakuldade Siénsia Sosiál–UNTL, Aniceto Guro-Berteni Neves halo aprezentasaun kona-ba Introdusaun Relatóriu no Rekomendasaun Chega, ba dosente  husi ensinu superiór sira hotu iha Dili no interesadu sira.

Atividade ne’e realiza iha salaun CNC, Balide-Díli, ohin, iha ámbitu kolókiu organizadu husi CNC.

“Kolókiu ida ne’e oportunidade daruak ba ha’u introdús ha’u-nia esperiénsia kona-ba uza relatóriu Chega! no idea Institusionalizasaun rekomendasaun Chega! iha Fakuldade Siénsia Sosiál-UNTL. Primeiru introdusaun iha momentu Komemorasaun tinan 75 ba Loron Invazaun Militár Japaun iha Timor-Leste iha Fakuldade Siénsia Sosiál – UNTL iha loron 20 Fevereiru 2018,” dehan peskizadór UNTL, Aniceto Guro-Berteni Neves.

Peskizadór ne’e esplika katak katak bazea ba Artigu 5.1 iha Dekretu Lei Nu. 48/2016 atribui kompeténsia Sentru Nasionál Chega! (CNC) a) atu promove no tau-matan ba implementasaun rekomendasaun sira Chega! nian relasiona ho Institusionaliza Memória, promove Direitu Umanu liuhusi edukasaun no formasaun.

  1. b) atu prezerva Memória no istória TL nian périodu 1974-1999; c) atu kontribui ba prevensaun violénsia no hatudu kultura dame, respeitu Direitu Umanu inklui direitu sovrevivente violasaun Direitu Umanu nian; d) atu kontribui ba iha dezenvolvimentu edukasaun sívika, treinamentu no hanorin metodolojia liga ho Istória Timor-Leste nian 1974-1999 no Direitu Umanu.

“Maibé iha rekomendasaun Chega! nian, atribui mós papél  Instituisaun sira Públika inklui Ensinu Superiór-sira ba implementasaun rekomendasaun Chega! nian. Ezemplu ita bele le’e iha rekomendasaun sira iha númeru 3.6.1-4, 3.7.1 – 7, 3.8.3-4, no 4.2.1-8 (relatóriu & rekomendasaun versaun Tetun),” akresenta dosente seniór UNTL ne’e.

Relatóriu no Rekomendasaun Chega! no papél  ensinu superiór ho eskola-sira, kona-ba atribuisaun kna’ar ka kompeténsia CNC nian tuir Artigu 5.1. Dekretu Lei Nu. 48/2016. “Entaun perguntas mak ne’e, kna’ar ka kompeténsia Ensinu Superiór ka Eskola sira mak saida tuir relatóriu no rekomendasaun Chega! ne’e?,” nia kestiona.

Nune’e’e, dosente no peskizadór Departamentu Dezenvolvimentu ne’e esplika katak husi relatóriu no rekomendasaun sira Chega! nian ne’e, kna’ar ka papél  Institutu Edukasaun, Ensinu Superiór no Eskola-sira-nian bele Le’e iha númeru rekomendasaun-sira tuir mai:

  • Halo Peskiza; kona-ba Timoroan nia kultura no tradisaun, dezenvolve sai identidade nasionál iha prosesu harii nasaun, liuhusi sistema edukasaun no universidade;
  • Dezenvolve Kuríkulu no metodolojia; Kolabora ho Governu no Igreja, dezenvolve valór Xave-sira ne’ebé apropriadu ho tradisaun no situasaun Timor-Leste nian, promove kultura dame, la ho violénsia, no Direitu Umanu;
  • Orienta Kursu sira bazea ba Timor-Leste nia esperiénsia-rasik; Governu (Setór Edukasaun) kolabora ho Igreja dezenvolve kurrikulum ba Direitu Umanu no metodologia hanorin nian hodi uza iha nível sistema edukasaun nian hotu;
  • Utiliza rekursu multi-media ne’ebé iha tiha ona; Departamentu Edukasaun nian, mestre no akadémiku sira, uza rekursu multi-media ne’ebé hari’i tiha ona (relatóriu CAVR 1974-1999) nu’udar dalan atu halo riku liu tan konteúdu kurrikulum edukasaun Timoroan nian no atu tulun hanorin kona-ba istória, siénsia polítika, rezolusaun ba konflitu, relasaun internasionál no lei;
  • Dokumenta no Avalia Efetividade medisina alternativu; Ai-kulit Ai-abut ka Ai-tahan no medisina alternativu ka aimoruk ne’ebé uza iha ai-laran duranti funu hodi halo rezisténsia, atu nune’e’e bele haree to’ok karik bele uza tan iha tempu oin mai;
  • Hala’o programa edukasaun Públika; ba tempu naruk liuhusi sistema edukasaun, atu nune’e’e hakle’an liu tan komunidade nia matenek kona-ba relasaun meiu- ambiente fíziku ne’ebé moos no saudável, liliu ba labarik sira.

Ensinu Superiór ka Eskola sira mós bele hola papél  ba realizasaun rekomendasaun númeru 3.6.1-2. Ensinu Superiór kolabora ho Institutu Públika sira inklui Organizasaun Sosiedade Sívil no CNC ne’e rasik para:

  • Implementa no hanorin iha eskola Programa Fórmasaun (Edukasaun Sívika); ne’ebé kompriensivu ne’ebé hare liliu ba estrutura, instituisaun no demokrasia nia prosesu nune’e’e mós sidadaun nia Direitu no obrigasaun;
  • Bazea ba rezultadu Peskiza, dezenvolve kuríkulu no matéria fórmasaun nian; Funsionáriu Públika hothotu, hanesan polisia, militár, mestri, impregadu sira ne’ebé iha Governu nia departamentu, simu bei-beik treinu, periodiku iha sira-nia servisu laran, no hetan evaluasaun kona-ba sira-nia funsaun hanesan Funsionáriu Governu no sidadaun Timor-Leste, atu nune’e sira garante katak sira halo sira-nia dever, ne’ebé Polítikamente imparsial, etika, no hanesan profisionál;

“Embora knar ka papél  CNC no Ensinu Superiór, importante mós envolve Komite Orientadór – 25 ne’ebé iha hela prosesu atu Institusionaliza nu’udar Institutu ba Peskiza Experensia no Istória Luta Joventude no Estudantil Timor-Leste nian. Komité Orientadór no Governu prepara hela Ezbosu Lei sobre ida ne’e,” reforsa dosente Aniceto Berteni.

Esperiénsia uza Relatóriu no Rekomendasaun Chega! iha Fakuldade Siénsia Sosiál-UNTL

  1. Direito Auto-Determinasaun, Violasaun Direitu Umanu, Kríme Kontra Umanidade, Kríme Funu nian no Responsabilidade Autor-sira-nian (Justisa Tranzisional);

Dezde hahú re-ativa kampus UNTL (transfórma husi UNTIM), adopta Disiplina (matéria) ida mak Direitu Umanu, depois muda fali sai Demokrasia no Direitu Umanu. Disiplina ida ne’e kuaze introdus iha Fakuldade hotu iha UNTL iha momentu ne’ebá!.

“Momentu ne’e ha’u sei ativu iha ONG Asosiasaun HAK hetan kontratu husi UNTL para toma konta ba introdusaun matéria ida ne’e. Hahú tinan 2003, ha’u sai dosente parte-tempu no iha 2006, nu’udar dosente permanente,” nia haktuir.

Desde ida ne’e no to’o agora iha prosesu aprendizajen (hanorin, aula), embora halo introdusaun kona-ba definisaun, prinsípiu, teória-sira, valor no mekanizmu implementasaun Demokrasia no Direitu Umanu, kapítulu (titlu) ida ne’ebé paralelu no adopta husi relatóriu no rekomendasaun Chega! nian mak “Direitu Auto-Determinasaun, Violasaun Direitu Umanu, Kríme Kontra Umanidade no Kríme Funu nian no Responsabilidade Autor-sira tuir Lei International”.

Agora dadaun matéria ka Disiplina Demokrasia no Direitu Umanu adopta no introdus iha Departamentu (a) Administrasaun Públika, (b) Siénsia Polítiku, (c) Dezenvolvimentu Komunitáriu, (d) Relasaun Internasionál, (e) Polítika Públika, no (f) Komunikasaun Sosiál iha Fakuldade Siénsia Sosiál-UNTL.

“Iha tinan 2007-2008, matéria no tópiku ne’ebé hanesan ha’u introdus ba Estudante iha Fakuldade Siénsia Humaniora iha UNPAZ [Universidade da Paz],” dosente Aniceto Berteni konta tuir.

Esperiénsia iha Sosiedade Sívil, durante iha Asosiasaun HAK, topiku ne’e mós Introdus iha programa treinamentu Lei no Direitu Umanu ba membru no Superiór sira PNTL, F-FDTL, autoridade lokál sira no empregadu sira iha ONG lokál sira. Introdusaun ba autoridade Governantes Sívil-militár atu asegura katak ita hotu aprende husi ita-nia Istória no esperiénsia konflitu ho Indonezia durante sira-nia okupasaun.  No espera katak autoridade Sívil militár Timor-Leste nia la repete ka replika métodu ukun no servi povu hanesan ho Indonezia.

  1. Jestaun ba Konflitu;

Matéria ka Disiplina Jestaun Konflitu ne’e adopta iha kuríkulu Departamentu Dezenvolvimentu Komunitáriu FSS-UNTL [Universidade Nasionál Timor Lorosa’e]. Iha deliverasaun matéria ne’e, embora halo introdusaun kona-ba definisaun ka konseitu, instrumentu-sira kona-ba analiza ba konflitu violénsia, estratéjia rezolve konflitu violénsia no maneira sira seluk iha Jestaun ba konflitu violénsia nian.

“Parte ida husi introdusaun ba teória sira kona-ba kauza no efeitu sira husi konflitu violénsia nian, ha’u introdus konseitu teoritiku no paradigma sira uza esperiénsia Timor-Leste nia iha périodu okupasaun Indonezia mak hanesan relata iha relatóriu no rekomendasaun Chega! nian;

Ezemplu, halo introdusaun kona-ba kompriensaun ba konflitu no violénsia, uza Triangulation Theory (Typology of Violent/Teori Segitiga)-Johan Galtung[1] nian: (DIRECT/CONTEXT, CULTURE AND STRUCTURE ba Konflitu Violénsia. Liga ba Relatóriu no Rekomendasaun Chega! nian:

  1. Direct/Context; husi konflitu iha Timor-Leste ne’e introdus kona-ba situasaun hirak ne’ebé kondisiona invasaun no violénsia Indonézia ba Timor-Leste, ezemplu perfil kona-ba violasaun Direitu Umanu iha Timor-Leste no Direitu ba Auto-Determinasaun nian;
  2. Culure; husi konflitu iha Timor-Leste ne’e demonstra kultura violénsia militár Indonézia nian hanesan tipu-sira violasaun Direitu Umanu sira ne’ebé akontese durante tinan 24 nia laran iha Timor-Leste;
  3. Structure; husi konflitu iha Timor-Leste ne’e introdus kona-ba violénsia estruturadu hanesan refere ba responsabilidade no akuntabilidade autor-sira-nian;

Ezemplu seluk nia uza The Nested Theory (Teori Laba-laba) of John Paul Lederach, hodi introdus kona-ba (a) Actos and Approaches; (b) Deskreve: Issue – relasaun – sub-sistem – system; (c) Dimensaun Tempu: Istória narativu – Memória – Istória – Esperansa ba Futuru (Desire Future).

  1. Actos and Approaches; esperiénsia Timor-Leste nian ne’ebé sai referénsia ba aplikasaun teória ida ne’e iha matéria Jestaun ba Konflitu tuir relatóriu no rekomendasaun Chega! nian bele refere ba responsabilidade no akuntabilidade autor-sira-nian;
  2. Deskreve: Issue – relasaun – sub-sistem – system; esperiénsia Timor-Leste nian ne’ebé sai referénsia ba aplikasaun teória ida ne’e iha matéria Jestaun ba Konflitu tuir relatóriu no rekomendasaun Chega! nian bele refere ba Direitu ba Auto-Determinasaun no Tipu Violasaun Direitu Umanu hirak ne’ebé akontese durante okupasaun militár Indonezia iha Timor-Leste;
  3. Dimensaun Tempu: Istória narativu – Memória – Istória – Esperansa ba Futuru (Desire Future); esperiénsia Timor-Leste nian ne’ebé sai referénsia ba aplikasaun teória ida ne’e iha matéria Jestaun ba Konflitu tuir relatóriu no rekomendasaun Chega! nian bele refere ba perfil violasaun Direitu Umanu iha kontestu luta ba Auto-Determinasaun nian;

Iha introdusaun kona-ba futuru harii Dame nian, uza nafatin teória ida ne’e hodi introdus dimensaun: tempu/futuru Dame nian, enkuandramentu intervensaun ba krizi – preparasaun no treinamentu – dezeñu futuru mudansa sosial no esperansa dame ba futuru (Desire fór future Peace) hahú husi introdusaun kona-ba: immediate action – short-range planning – decade thingking – generational vision;

“Ikus ha’u dezeñu enkuandramentu trabalhu ne’ebé integradu: jestaun ba krizi (oinsa ita jere krizi emidiata), Transfórmasaun (oinsa ita sai husi krizi ba futuru dame nian), kauza prinsipál (saida mak kauza abut husi konflitu), prevensaun (oinsa prevene konflitu iha tempo oin mai), vizaun (estrutura sosial no relasaun ida oinsa mak ita hakarak iha fututure), nsst. Iha ne’e, embora ita iha esperiénsia kona-ba Rekonsiliasaun Komunitáriu, ita iha Tribunal Adhock (TL & RI), ita mós dezeizu ba kompensasaun no rekoperasaun inklui Justisa ba Kríme Pasadu-nian. Ha’u adopta konseitu husi AJAR nian karik ne’e mak bolu: Justisa Tranzisionál ba Timor-Leste,” nia esplika.

  1. Nasaun no Nasionalismu; Matéria ka Disiplina ida ne’e adopta iha Fakuldade Siénsia Sosiál-UNTL durante ida ne’e. Ha’u-nia esperiénsia ha’u hanorin (introdus) matéria ne’e iha Departamentu Dezenvolvimentu Komunitáriu, Departamentu Siénsia Polítika no Administrasaun Públika. “Tópiku importante ida husi ha’u-nia introdusaun ba matéria ida ne’e mak halo mapamentu ba esperiénsia movimentu resisténsia no luta populár ba Libertasaun Nasionál hahú husi Latina Amérika, Reziaun Áfrika, Azia, Indonézia no mai to’o Timor-Leste. Ba Timor-Leste, leitura ne’ebé ha’u introdus liga ho matéria ida ne’e liuliu hanesan deskreve iha relatóriu no rekomendasaun Chega! kona-ba Auto-Determinasaun nian,” dosente Aniceto esplika tan.

Iha ninia esperiénsia hanorin matéria tolu ne’e, interesante katak uza relatóriu no rekomendasaun Chega! nian sai leitura importante hodi kontektualiza Memória pasadu nian ba Estudante. Maibé ida ne’e nu’udar asaun pesoál ninian tanba seidauk atualiza iha kuríkulu iha FSS-UNTL nian.

“Bazea ba ha’u-nia leitura ba Disiplina ka matéria sira iha FSS-UNTL nian, iha matéria balun tan mak importante atu uza relatóriu no rekomendasaun Chega! ba estudante sira. Ezemplu iha FSS-UNT nian iha matéria kona-ba (a) Istória Jerál, (b) Introdusaun ba Relasaun Internasionál, (c) Polítika Públika, (d) Feto, Joven, Lideransa no Dezenvolvimentu, (e) Introdusaun Siénsia Polítika, no seluktan,” leitór seniór universidade públika ne’e refere.

  1. Utilizasaun ba Rekursu Multi-media ne’ebé iha tiha ona; Loos duni, Komisáriu sira CAVR nian durante halao sira-nia mandatu, sira la’ós de’it produs relatóriu testual Maibé produs mós rekursu Multi-Media hodi prezerva Memória husi sasin ka depoimentu-sira.

“Ha’u seidauk uza rekursu Multi-Media. Ida ne’e instrumentu importante atu uza hodi hanorin. Ha’u seidauk uza instrumentu multi-media ne’ebé iha, Maibé orienta estudante-sira para partisipa no akompaña atividade Organinizasaun Sosiedade Sívil nian iha momentu komemorasaun loron nasional ne’ebé inklui programa loke filme Istória, halo refleksaun no seluk tan. Ba futuru, halo aproveitamentu ba rekursu multi-media iha CAVR, Muzeum da Rezisténsia no fatin seluk sei sai opsaun obrigatóriu ba universitáriu-sira ne’ebé programa Disiplina ka aula ba matéria relevante,” nia rekoñese.

Estratéjia Implementasaun Rekomendasaun Chega! iha Ensinu Superiór-sira

Parte ida ne’e liga ho kestaun “oinsa”? Ida ne’e involve diskusaun sira kona-ba estratéjia! Signifika oinsa deside estratéjia atu implementa relatóriu no rekomendasaun Chega! nian iha Ensinu Superiór iha Timor-Leste?.

Nu’udar dosente, nia propoen hanoin hirak hanesan tuir mai:

  • Institusionaliza Implementasaun Rekomendasaun Chega! iha Dezenvolvimentu Ensinu Superiór (Educational setting);

Agora dadauk foin iha nivel inisiativu de’it, signifika katak se’e kuandu ita hatuur papél  ne’e ba iha Dosente sira de’it, signifika ita hakarak sosiedade academico sira ho konSiénsia, ho voluntariamente ka hakarak rasik atu introdus relatóriu no rekomendasaun Chega! nian la’ós nu’udar obrigatóriu ida. Katak fó liberdade! Maske dosente ida nu’udar membru sosiedade akademiku, Maibé la signifika kesi-an ho knar konserva Memória Pasadu no Istória Povu Timor-Leste nian tuir rekomendasaun Chega! ne’e rasik. Institusionaliza signifika saida? Katak Institutu adopta relatóriu no rekomendasaun Chega! nu’udar knar ka papél  Instituisaun nian ne’ebé integradu ho vizaun, misaun, objetivu no estratéjia sira Ensinu nian;

Ho nune’e, Ensinu Superiór sira bele hatuur papél  Konserva Memória Pasadu no Istória Pasadu liuhusi enkuandramentu legal ne’ebé existe hodi regulariza funsionamentu Ensinu Superiór sira (Approaches to Institusionalism: Rittenberger, 1993; Knoke, Pappi and Tsujinaka, 1996; Kickert, Klijn and Koopenjaan, 1997). Aproximasaun Institusional lojik liu tanba involve aspeitu normativu no modalidade organizasionál kompara ho aproximasaun inter-personal (March and Olsen (1984; 1989; 1996);

Centru Nasional Chega! (CNC), identifika tiha ona Kampus Fakuldade Siénsia Sosiál – UNTL nian ne’e nu’udar parte ida husi Situs Istóriku. Kampus ida ne’e (FSS-UNTL) kuda Memória pasadu lubun ida, tanba ne’e uza aproximasaun Dezenvolvimentu Institusional nu’udar eskolla ne’ebé rasionál (rational choice Institutionalism). Ensinu Superiór sira inklui kampus FSS nu’udar Entidade Lejítimu, posibel atu halo aranjamentu ba regulamentu/provizaun legál no insentivu (fundus) hodi asegura papél  Konserva Istória Pasadu;

La’ós intensaun atu ignora existente Ensinu Superiór sira seluk, tanba Kampus FFS-UNTL nu’udar situs Memória, nune’e Historical Institutionalism nu’udar aproximasaun ida pertinente.  Kampus FSS-UNTL hanesan situs istóriku, nu’udar evidénsia konkreta (factual evidence), no depois halo peskiza no hakerek Memória hirak ne’e bele sai nu’udar aproximasaun empirikál institutionalism iha prosesu estudu/peskiza no hakerek Istória ba prezervasaun Istória Pasadu nian (Weaver and Rockman, 1993; Von Mettenheim, 1996).

“Tanba ne’e, ha’u propoen asaun afirmativu ba Integrasaun Memória Pasadu no Istória nian iha dezenvolvimentu Seitor Edukasaun (fórmulasaun vizaun, misaun, estratéjia no objetivu Instituisaun Edukasaun tenke refleta Memória Povu no Istória pasadu nian,” peskizadór Aniceto Berteni Neves propoen

UNTL iha hela prosesu harii Departamentu Istória, ida ne’e nu’udar meius ida atu asegura implementasaun rekomendasaun Chega! no kontribui matéria sira kona-ba hanorin Memória Pasadu no Istória Povu Timor-Leste nian;

  • Adopta no atualiza iha Programa Sentru-sira Peskiza Sientífika Ensinu Superiór-nian;

Iha UNTL, tenke integra iha planu programa Peskiza Sentru Nasionál Investigasaun Sientífika (CNIC-Sigla iha Portugés) nian. Fiar katak Ensinu Superiór (Universitáriu, Akademia ka Institutu) sira Iha Sentru ba Peskiza. Liuhusi Sentru hirak ne’e promove programa Peskiza kona-ba Memória Pasadu no Istória Povu Timor-Leste liuliu tuir rekomendasaun Chega! ba pontu hirak temi iha leten ne’e. Bele mós liuhusi Sentru hirak ne’e enkoraja no fó oportunidade ba Estudante finalista sira hodi halo peskiza ba Monografia;

  • Adopta Chega! nu’udar Matéria ka Disiplina Jerál/Universitáriu (MKDU);

Ensinu Superiór sira obrigatóriu adopta Chega! nu’udar matéria obrigatóriu ida. Ba ida ne;e Ministerio Edukasaun hamutuk ho CNC no Dosente-sira tuur hamutuk no fórmula kuríkulu ida ba de’it Chega! nu’udar matéria ba Universitáriu Iha kuríkulu ne’e inklui aplika métodu hanorin uza rekursu “multi-media” ne’ebé iha tiha ona iha CNC, Muzeum Resisténsia no leitura ka Públikasaun testuál seluk husi akademista-sira (Livru, Artigu, nsst);

  • Orienta Estudante Universitáriu finalista ba peskiza;

Uza estudante finalista sira ba promove Programa Prémiu Peskiza Memória no Istória Pasadu nian ba Estudante, dosente, Profesores Nasional no Internasionál sira liuhusi Fundus husi OJE no Kooperasaun sira bilateral nian. Maibé ne’e defende ba Dosente Orientadór, exetu programa anuál husi Sentru Peskiza no fó oportunidade ba Estudante hodi asesu ba fundus Peskiza iha kada Sentru sira-nian;

  • Integra Rekursu sira iha leitura obrigatóriu;

Uza testu Memória Pasadu no Istória (Chega!, CVA Report, Livu, Video, testimonia/depoimentu sira nu’udar matéria Ensinu nian iha Universitáriu ezemplu mak hanesan iha FSS-UNTL nian Chega! nu’udar matéria no rekursu sira nu’udar intrumentu ne’ebé obrigatóriu uza aula. Integra kapitulu sira husi Chega!, CVA Report, Livru, nsst iha Sylabus ba Matéria Istória Jerál, Demokrasia no Direitu Umanu, Estudu Relasaun Internasionál, Polítika Públika, Direitu Umanu no Dezenvolvimentu. Iha UNPAZ, bele integra iha Programa Mestradu nian iha Estudu “Harii Dame” nian, nsst;

“Ikus! atu hataan ba rekomendasaun Bazea ba númeru rekomendasaun Chega!: 3.6.1-4, 3.7.1 – 7, 3.8.3-4, no 4.2.1-8, estratéjia pontu 1 (Institusionaizasaun) no pontu 2 (adopta iha programa Sentru Peskiza) nu’udar opsaun ne’ebé própria. Ho opsaun rua ne’e, Universitáriu bele halo peskiza ba hakerek testu kona-ba Memória Pasadu nian no Istória, dezenvolve metodolojia, dezeñu kuríkulu ba formasaun no treinamentu, no seluk tan,” konklui peskizadór UNTL ne’e.

Jornalista: Rafy Belo

Editór : Manuel Pinto

HUSIK IDA HATÁN