António Guterres Sente Previléjiu Nu’udar Sasin ba Akordu Ketan Tasi

0
184
Sekretáriu Jerál Organizasaun Nasoen Unida (ONU), António Guterres, Foto mídia UN

DILI, (TATOLI) – Sekretáriu Jerál Organizasaun Nasoen Unida (ONU), António Guterres, sente previléjiu bainhira sai sasin iha seremónia asinatura tratadu ketan tasi (fronteira marítima) entre Timor-Leste ho Austrália.

“Ida ne’e loron importante ba ha’u tanba ha’u nia kareira polítika pasada liuhosi povu Timor, agora ha’u kontente no previléjiu ida mai ha’u iha ne’e atu akompaña Timor-Leste hanesan nasaun independente ida hodi asina tratadu ne’e”, tenik iha ninia intervensaun iha seremónia asinatura tratadu ketan tasi entre TL ho Austrália iha Kuartél Jerál ONU, Novaiorke, ohin.

Tuir nia eventu ne’e hanesan istóriku ida tanba hatudu konkluzaun ne’ebé susesu husi prosesimentu konsiliasaun, nune’e nia kongratula nasaun rua nomós komisaun tanba parte bele konkorda ho akordu.

“Kongratula ba governu no komunidade Austrália nomós Timor-Leste tanba hakotu ona mekanismu konsiliasaun ne’e, ho esforsu imi konsege ona hetan fleksibilidade prosedimentu ba rezolusaun disputa ida”, katak.

Akordu ne’e, nia akresenta asina ho kontribuisaun atu estabelese relasaun dame, seguransa no dezenvolvimentu sustentável liuhosi delimitasaun ketan tasi iha Tasi Timor no estabelese rejime espesiál iha kampu gás Greater Sunrise.

Nune’e fó saudasaun ba vizaun no determinasaun ne’ebé halo ona posibilidade ba akordu ne’e no espera bele hetan susesu iha implementasaun atu fó inspirasaun ba nasaun seluk atu banati tuir.

Parte hanesan Prezidente Komisaun Konsiliasaun, Embaixadór Peter Taksøe-Jensen, hateten akordu ne’e bele realiza tanba dedikasaun no esforsu maka’as husi delegasaun nasaun rua.

Hodi dehan, TL deside atu hakotu prosesu ida ne’e enkuantu Austrália konsente mekanizmu ne’e obrigatóriu atu hetan oportunidade rezolve problema ne’ebé kleur ona kona’-ba ketan tasi no estabele relasaun ne’ebé metin liután.

“Agradese ba imi nia dedikasaun iha situasaun difísil atu hakotu prosesu ne’e bainhira foti desizaun defísil no kompromisu atu hetan akordu”, katak.

Hodi haktuir tan iha loron 10 juñu 2016 hetan kontaktu husi Governu TL atu rezolve problema Tasi Timor hodi komisaun Konsiliasaun no husu nia atu sai Prezidente ba komisaun ne’e.

“Momentu ne’e ha’u aseita no ha’u dehan ha’u laiha ideia ida maibé ha’u tenta atu tuir prosesu ne’e”.

Jornalista: Julia Chatarina

Editora: Rita Almeida

HUSIK IDA HATÁN