ANC Realiza Semináriu Kona-ba Seguransa Sibernétika

0
111
Ilustrasaun siber seguransa. Foto espesiál/google

DILI, (TATOLI) – Autoridade Nasionál Komunikasaun (ANC-sigla portugés) realiza semináriu datoluk ne’ebé involve jestór Information and Communication Technology (ICT) no setór privadu sira kona-ba implementasaun no oinsá bele monitoriza insidente ba seguransa informátika.

“Semináriu ne’ebé ANC hala’o atu sensibiliza no eleva koñesimentu matéria sibernétika ne’ebé envolve jestór ICT nomós setór privadu sira kona-ba implementasaun no oinsá ita bele monitoriza insidente ba seguransa informátika ninian”, tenik Prezidente ANC, António Correia, iha salaun Obras Públikas, ohin.

Kona-ba insidente ba seguransa informátika nian, nia dehan tenke prepara rekursu umanu ne’ebé iha kapasidade atu bele jere ba risku, nune’e ANC nafatin hakarak dezenvolve rekursu umanu iha área ICT.

Parte seluk asesor ANC, José Lay, iha ninia intervensaun hateten atu fó seguransa informátika la  to’o de’it kria ajénsia maibé ne’e hanesan rezolusaun.

“Sekarik ita asegura rede ida-ida hanesan rede universidade, rede operadór, rede departementu, rede ministériu ninian, sira ne’e bainhira tau hamutuk ita nia rede bele seguru, maibé la rezolve ho governu kria ajénsia ida atu haree ba asuntu refere”, tenik.

Hodi dehan rede ida bainhira liga ho internet presiza implementa firewall (sistema seguransa ba rede komputadór) no Instruction Detection System (IDS) ne’ebé hanesan sistema atu halo seguransa ba tráfiku rede, espesial liu ba rede ne’ebé rigorozu.

Iha semináriu ne’e partisipa jestór ICT iha ministériu sira, dosente, estudante universidade, setór privadu no seluk tan.

Hafoin semináriu sei iha formasaun durante loron rua hahú ohin to’o aban ba partisipante sira ne’ebé rejista ona ba formasaun ne’e.

Jornalista: Julia Chatarina

Editora: Rita Almeida

HUSIK IDA HATÁN