AIFAESA Taka Tan Restaurante 19 Tanba La Ijiene

0
157
Pesoál AIFAESA ko’alia hela ho restaurante na’in bainhira entrega notifikasaun atu ensera atividade provizória.

DILI, (TATOLI) – Tanba laiha kondisaun ijiene, lisensa mate no hala’o atividade latuir lisensa, restaurante 19 ne’ebé estabelese iha área Bekora, Kuluhun, Bidau, Fatuhada no Kampung Alor taka provizóriu husi Autoridade Inspesaun no Fiskalizasaun ba Atividade Ekonómika no Sanitária (AIFAESA).

Antes ne’e AIFAESA nia operasaun iha faze dahuluk halo ona enseramentu ba estabelesimentu haat, tuirmai ba restaurante 23 no ohin 19.

Koordenadór AIFAESA, Abílio Oliveira Sereno, hatete operasaun ne’e sei termina bainhira AIFAESA halo hotu inspesaun iha sidade Dili.

“Operasaun ne’e halo ho kooperasaun no protesaun husi Polísia Nasionál Servisu Investigasaun Kriminál (PNSIK) ne’ebé simu orientasaun direta husi Ministériu Públiku no restaurante sira-nia na’in mós simu desizaun ne’ebé hatún ho pasífiku tanba la’ós atu taka para sempre, ami mai atu suspende sira-nia atividade para halo fali sasán ho moos”, Abílio hatete iha Kampung Alor, ohin, hafoin ensera atividade restaurante 19 ne’e.

Bainhira laiha ijiene AIFAESA sei labele demora atividade estabelesimentu sira ne’e nune’e hapara hodi hadi’a hafoin loke fali.

“Ami lakontra negosiante sira, ami hakarak hamutuk ho negosiante sira para serbí povu, populasaun no konsumidóra hodi oferese saúde di’ak ba sira”.

Restaurante ne’ebé ohin taka ona iha Bekora mak Esperansa Unip, Lda, The Secret Unip, Lda, Belinha Syarayat Berlinton, Manuel Rosito Ximenes (Fremije Enin), Restaurante Fred Chunsul Dani, Warung Mol Jereng no Moris Neineik, Enin.

Iha área Kuluhun Restaurante Ndsolicios no Bidau nian mak Lie Siao Ha Frenky Star no Amdil, Unip, Lda.

Fatuhada iha restaurante neen hanesan Arafah Bakery and Resto, Ali Asian Food, Khaila Restaurant, Restaurante 288, Putri Bungsu no Atere Ingridientes.

Iha parte Kampung Alor mak Indo Pustelaria, Resto Bundo no Tijulino Getrudes da Costa.

Jornalista: Maria Auxiliadora

Editora: Rita Almeida

Notísia ne’ebé relasiona : http://www.tatoli.tl/2018/02/ohin-aifaesa-taka-restaurante-23-iha-bidau-aitarak-laran-no-fatuhada/

HUSIK IDA HATÁN