ADTL Lamenta FMSS-UNTL Transfere Defisiente

0
143
Reprejentante Diretór Asosiasaun Defisiénsia Timor-Leste (ADTL), Cesario da Silva (daruak hosi liman loos) bainhira partisipa kongresu ETBU ba datoluk iha salaun Pradet Bidau Toko Baru. Foto FB Dize Cesario Adhabel

DILI (TATOLI)-Asosiasaun Defisiénsia Timor-Leste (ADTL) lamenta Fakuldade Medisina, Siénsia no Saúde (FMSS), Universidade Nasionál Timor Lorosa’e (UNTL) transfere defisiente ho naran Alito Pinto ba departamentu seluk tanba konsidera defisiente.

“Ho laran triste hakarak informa ba públiku katak ohin iha istória Timor-Leste nian, liuliu iha ambiente akadémiku ne’ebé atu tane aas valór umanu halo hela aktu diskriminasaun hasoru ema ho defisiénsia,” refere ADTL liuhusi komunikadu, mai ajénsia TATOLI, ohin.

Iha komunikadu ne’e, ADTL mós akresenta, ita hotu louva hela Universidade Nasionál Timor Lorosa’e (UNTL) tanba nia hatudu ezemplu di’ak hodi simu estudante ema ho defisiénsia ba eskola iha kursu Inkluzaun Komunitária i Sosiál, iha parte seluk reseita estudante ida tanba ninia defisiénsia fízika, liuliu defisiente Alito Pinto..

Alito Pinto, hanesan estudante ida ne’ebé nia naran pasa iha UNTL iha Departamentu Enfermajen, Fakuldade Medisina no Siénsia Saúde ho Númeru 46 husi lista Ministériu Edukasaun nian. Nia kontente loos atu hahú nia estudu iha área ida ne’ebé nia mehi kleur ona.

Alito Pinto mós tuir ona prosesu orientasaun durante loron tolu iha Lahane Dili, nó mós partisipa ona iha aula durante semana rua. Atu tama ba prosesu prienxe KRS (Kartu Rencana Studi), bainhira deteta katak Alito Pinto hanesan ema ho defisiénsia fízida, dekanu fakuldade ho nia vise husu kedas estudante refere atu transfere obrigatóriu ba departementu seluk ho razaun tanba Alito Pinto ne’e defisiente ida.

Nia reseita transferénsia tanba nia hakarak tebetebes atu halo nia estudu iha área ida ne’e. Hatene katak Alito Pinto reseita transferénsia, dekanu ho nia vise husu atu hasoru ho Alito nia inan-aman. Nune’e inan-aman husi Alito hasoru ona dekanu dala haat.

Tuir kronolojia, dahuluk iha loron 19 Fevereiru no 22 Fevereiru. Tuir mai, iha loron 25 Fevereiru 2018 ADTL simu informasaun kona-ba aktus diskriminativu hasoru ema ho defisiénsia ida ne’e.

Iha dia 27 Fevereiru ekipa ADTL akompaña Alito Pinto ho nia inan-aman hodi ba hasoru dekanu iha nia serbisu fatin iha UNTL. Simplesmente dekanu reseita atu enkontru ho razaun okupadu, maski nia mak husu atu hasoru nia iha loron refere. Alito Pinto kontinua tama aula, maibé nia naran ko’a sai tiha ona husi lista prezensa la hanesan semana rua antes.

Loron 12 Marsu 2018 ekipa ADTL ho reprezentante inan-aman husi Alito Pinto halo esforsu dala ida tan hodi hasoru ho dekanu. Maibe, laiha rezultadu pozitivu ba Alito Pinto atu kontinua estuda iha Departamentu Enfermajen, Fakuldade Medisina, Siénsia no Saúde (FMSS), UNTL.

“Ho nune’e, ami reprezentante inan-aman hamutuk ho ADTL konsidera aktu ida ne’e hanesan aktu diskriminativu hasoru ema ho defisiénsia nia hakarak, no sei lori keixa ida ne’e ba aprezenta iha Provedoria dos Direitos Humanos e Justisa (PDHJ) hanesan instituisaun Estadu ba defeza direitu umanu sidadania nian, no ami mós husu atu PDHJ reprezenta Alito Pinto hanesan keixa na’in atu foti medidas urjénsia hasoru aktu diskriminativu ida ne’e,” ADTL husu liuhusi komunikadu ne’e.

“ADTL reprezenta lian ema ho defisiensia nian, husu atu PDHJ ho UNTL buka solusaun lalais ba kazu ida ne’e,” reforsa tan ADTL.

Entretantu, to’o notísia ne’e hatún, ajénsia TATOLI seidauk konfirma ho UNTL, liuliu FMSS.

Jornalista: Rafy Belo

Editór : Manuel Pinto

HUSIK IDA HATÁN