FOTO Midia One Timor/ Fontes : Google

DILI (TATOLI) – Uniaun Nasionál Eskuteiru Timor-Leste (UNETL) relata progresu servisu durante ne’e ba Primeiru-Ministru (PM).

“Ohin hasoru Primeiru-Ministru, atu informa progresu ne’ebé Uniaun Nasionál Eskuteiru hetan durante ne’e no hato’o mós sertifikadu ofisial ne’ebé mak Organizasaun ne’e hetan nu’udar membru rejiaun Ázia Pasífiku dezde tinan kotuk”, tenik Komisária Internasionál UNETL, Filomena Barros dos Reis ba jornalista sira iha Palásiu Governu, ohin.

Iha oportunidade hanesa, ekipa UNETL mós informa sei iha vizita kortezia husi Konsellu Eskuteiru Rejiaun Ázia Pasífiku iha fulan oin, atu mai vizita nu’udar misaun dahuluk hafoin UNETL sai nu’udar membru mundiál.

“Ami husu Primeiru-Ministru nia tempu iha loron 2 Abríl bele hasoru malu no ami haksolok tanba Primeiru-Ministru hakarak hasoru Konsellu Eskuteiru Rejiaun Ázia Pasífiku”, Filomena Barros dos Reis sente kontente.

UNETL durante servisu hetan dezafiu oin-oin maibé halo ona servisu komunidade barak hanesan servisu hamutuk rotary club no mós eskuteiru Australia sira hodi hari hariis fatin sintina ba komunidade sira.

Alende ne’e eskuteiru sira rasik hari uma ba ema k‘bit laek no programa ida tan mak massager of peace (MOP) ho orsamentu ne’ebé mai husi membru UNETL nó mós apoiu balun husi parseiru no governu.

Durante hala’o servisu dezafiu ne’ebé hetan mak laiha orsamentu tanba ekipa ne’e servisu voluntariamente no dehan planu organizasaun ne’e nafatin halibur joven sira.

“Planu ba oin UNETL la’o nafatin ho ninia métodu no halibur nafatin joven sira atu halo revolusaun karakter no serve nasaun tuir k’bit ne’ebé iha tanba joven labele hein atu simu de’it, maibé tenke kria atividade ba ninia an no husi atividade sira ne’ebé iha, atrai ema seluk atu hamutuk fó nafatin apoiu”, Filomena Barros dos Reis enkoraja.

Entretantu, to’o oras ne’e membru UNETL iha ona 11.000 iha munisípiu Dili, Aileu, Baucau, Lospalos, Viqueque, Ainaro, Ermera, Bobonaro, inklui RAEOA, enkuantu falta Liquisa sei iha prosesu atu hari, Manatuto, Same, no Covalima halo hela preparasaun.

Jornalista: Julia Chatarina

Editór : Manuel Pinto

 

HAKEREK NO HATÁN

Please enter your comment!
Please enter your name here