DILI (TATOLI)–Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur husu ba lider partidu polítiku (Parpol) sira tenke hatudu maturidade no responsabilidade perante povu no Nasaun, maibé labele ameasa malu.

Nia dehan labele ameasa malu tanba ema ne’ebé forsa liu ne’e sei iha no ameasa malu kuandu ran nakali ne’e sei responde malu rame.

“Iha Timor ne’e só ha’u ho Komandante Jerál Polísia Nasionál Timor-Leste (PNTL), Júlio da Costa Hornay maka bele ameasa ema tanba kro’at iha ami nia liman,” Lere ko’alia asuntu ne’e ba jornalista sira iha Palásiu Prezidente Nicolau Lobato, Bairru Pité, Dili, Kuarta ne’e, relasiona ho lider Parpol balun halo konsolidasaun partidu la ko’alia programa maibé ameasa malu fali.

Tuir nia katak sai polítiku ona ne’e labele impoin hanesan iha Forsas Armadas, maibé tenke komunga demokrasia.

“Partidu bele ket-ketak maibé tenke hakuak malu, hakuak povu no kria pás hodi loke dalan ba dezenvolvimentu,” eis lider gerrilleiru ne’e haklaken.

Kona-ba seguransa ba kampaña no eleisaun antesipada, Lere informa, PNTL no F-FDTL preparadu no komesa haree ninia dispozitivu ka lojístika atu koloka membru PNTL no F-FDTL iha loron 1 ka 2 Abríl para hahú movimenta ona.

“Polisia no F-FDTL la’ós determinante. Sira iha ne’ebá atu mantein orden no Lei. Mantein órden no Lei ne’e tenke iha impozisaun. Katak, tenke impoin forsa bainhira iha problema,” nia afirma.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here