Prezidente CNE, Alcino Barris. Foto Antonio Goncalves

DILI (TATOLI)– Prezidente Komisaun Nasionál Eleisaun (CNE-Sigla Portugés), Alcino Barris husu ba partidu polítiku (ParPol) hotu atu hatama ona kalendáriu kampaña eleitorál ba eleisaun antesipada.

“Ha’u enkontru ho reprezentante partidu polítiku (ParPol) atu informa kona-ba kalendáriu eleisaun nian tanba prazu hatama kalendáriu ba 3 Abríl de’it no regra ba kampaña eleitorál atu partidu hotu bele informadu,” Prezidente CNE, Alcino Barris hafoin reuniaun ho ParPol sira iha Salaun Laline CNE foin lais.

Kalendáriu kampaña ParPol regula iha lei 7/2017 eleisaun parlamentár mensiona katak partidu polítika sira tenke hatama sira nia kalendáriu loron lima molok ba kampaña eleitorál, nune’e tempu hatama kalendáriu iha 3 Abríl atu órgaun eleitorál bele ajusta.

Kalendáriu nia importánsia mak sei sai matadalan ba parpol sira hodi halo kampaña  nune’e labele hamosu soke malu entre Parpol iha kampaña.

“Sira konkorda mútua no sira sei halo sira nia deklarasaun atu obedese másimu ba regra ne’ebé iha vigor,” Alcino dehan tan.

Atu obedese regra kampaña eleitorál, CNE prevee ona atu halo paktu unidade nasionál ne’ebé sei realiza iha loron 7 Abríl no partidu polítiku sira entuziasmadu atu órgaun eleitorál bele organiza paktu ne’e.

Paktu unidade nia objetivu atu garante katak eleisaun ne’e responsabilidade Timoroan nian no labele surge buat ruma, kria distúrbiu iha prosesu eleisaun.

Nune’e mós atu reforsa atitude hodi hametin lei hirak ne’ebé vigor atu prosesu kampaña to’o eleisaun bele la’o ho di’ak.

Enkuantu, regra ba partidu polítiku sira tenke uza linguajen ne’ebé di’ak durante kampaña, nune’e husu atu respeita malu hanesan respeita liberdade ba partisipasaun kada eleitór nian atu labele prezudika malu, iha kampaña ne’ebé sei hahú iha loron 10 Abríl, tuir kalendáriu kampaíña.

Jornalista : Zezito Silva

Editór : Manuel Pinto

HAKEREK NO HATÁN

Please enter your comment!
Please enter your name here