Foto/Alfándega.

DILI, (TATOLI) – Diresaun Jerál Autoridade Aduaneira (AA) hala’o tan ona nia programa iha Postu Integradu Batugadé hodi lansa ba prosesu hand carry liuhusi sistema Asycuda Mundiál, hodi hafasil serbisu Alfándega no despaxante sira-nian.

Diretár Jerál AA en ezersísiu, Julião J. Ximenes, hatete hahú husi primeiru ne’e halo prosesu ba kargo no pasajeiru ne’ebé tama liuhusi fronteira Batugadé ne’e uza sistema kanál ida de’it, maibé hafoin lansa tiha sistema ne’e horisehik (27 marsu 2018), komesa ona hodi utiliza prosesu sistema Asycuda World.

ASYCUDA mundiál ne’e nu’udar polítika Governu nian liuhusi Ministériu Planu no Finansas liuliu AA maka hala’o prosesu ne’e no programa ida ne’ebé mak ba reforma fiskál nian ne’ebé durante ne’e halo.

“Ho sistema ida ne’ebé antes ne’e Alfándega iha Batugadé halo prosesu ne’ebé mak liuhusi kargo nomós hand carry ida ne’e prosesa diretamente liuhusi broker, maibé komesa horisehik sasán sira ne’ebé mak mai ita kategoria hanesan kargo, sira kontinua prosesu ba iha despaxante sira hafoin lori mai Alfándega halo nia prosesu no pasajeiru sira diretamente selu iha Banku, maibé ida hand carry ne’e, agora  Alfándega mak prosesa direta ona lapresiza to’o fali iha broker”, Julião hatete iha eis edifísiu Ministériu Planu no Finansas, ohin.

Razaun ba implementasaun sistema ne’e mak oinsá bele minimiza serbisu no fó atendimentu ho lalais. Ida ne’e mak objetivu ba implementasaun prosesu hand carry via ASYCUDA mundiál.

“Liuhusi hand carry ne’e, ita-nia pasajeiru sira kuandu mai lori sasán iha liman, bainhira menus dólar 300 sira laselu taxa, maibé mais dólar 300 sira mai aprezenta iha Alfándega ho dokumentu ne’ebé iha, Alfándega prosesa tuir regra normál, sira lapresiza bá prosesa iha broker sira tanba dalaruma sira lori sasán husi hand carry hanesan dólar 350 entaun dólar 50 sira selu tiha taxa, ne’ebé sira bá selu tan iha broker automátikamente sasan ne’ebé lori ultrapasa tiha taxa ne’ebé iha”.

Tanba ne’e ho sistema ne’ebé lansa ona ne’e bele redús ona serbisu broka nia no kompeténsia ne’e fó ba Alfándega mak prosesa, nune’e fasilita komérsiu ho lalais no lapresiza loron ida ka rua, maibé dentru oras ida ka rua prosesa dokumentu ho atendimentu ne’ebé lalais liu.

Aleinde Batugadé, iha abríl nia laran AA sei halo mós lansamentu ida ne’e iha fronteira Salele, Kovalima. Iha fulan kotuk halo tiha ona lansamentu dahuluk iha Aeroportu Internasionál Nicolau Lobato, Dili ne’ebé daudaun halo ona prosesu iha ne’ebá.

Sistema ida ne’e di’ak tebes no kuaze aplika iha país dezenvolve inklui Timor-Leste no bele garante seguransa nomós asegura akuntabilidad, transparénsia bainhira dadus ne’e to’o iha ne’ebé sei bele rai metin no loron ida presiza filafali fasil para bele loke no haree.

“Ida ne’e mak programa ida liuhusi Komisaun Reforma Fiskál nia serbisu maka’as hamutuk ho Alfándega esforsu hela no halo programa ida ne’e para futuru bele iha mós hanesan planu ne’ebé mak Governu trasa ona katak ita sei uza sistema ida hanesan janela únika”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here