Foto/Google.

DILI, (TATOLI) – Restaurante 14 no indústria Tahu ida, ohin enserra ona nia atividade provizória hodi bele prienxe rekizitu ijiene nian hafoin bele kontinua filafali.

Enserramentu ida ne’e hala’o husi Autoridade Inspesaun no Fiskalizasaun ba Atividade Ekonómika no Sanitária (AIFAESA) tanba restaurante no indústria sira ne’e seidauk tuir padraun ijiene nian tuir dekretu lein númeru 28/2011 nomós balun lisensa mate no laiha.

Diretór Operasaun, AIFAESA, Gabriel da Costa, hatete AIFAESA kontinua nafatin halo prosesu ne’e bá oin no husu ba operadór ekonómiku sira ne’ebé durante ne’e halo negósiu iha restaurante nian atubele halo koordenasaun ho AIFAESA hodi bele hadi’a sira-nia fatin.

“Se husi parte AIFAESA bá sira-nia fatin hodi halo inspesaun maka hetan nafatin restaurante ne’ebé la ijiene maka AIFAESA sei prosesu hodi halo auto notísia kontraordenasaun hasoru estabelesimentu sira”, Gabriel hatete iha Usindu I hafoin taka indústria Tahu ne’e, ohin.

Durante inspesaun ne’ebé halo semana rua nia laran ba kotuk ne’e AIFAESA deteta estabelesimentu 15 ne’ebé taka ona no sei kontinua nafatin bá semana rua mai tan hodi bá fatin sira seluk.

Restaurante ne’ebé ohin taka provizóriu ne’e iha área Bekora mak Padang Banana, Restaurante Coli, Georgina Fátima de Jesus. Iha Audian mak Amin Restaurante Enin, Virginia da Costa Mendonça, Restaurante Dame Resto.

Parte Bemori mak Eklesia Feoh Enin, tuirmai iha Kuluhun mak Restaurante Cresem Semi no Kaikoli-Restaurante Marbes, Kampung Alor-Indo Pastelaria, Fatumeta-Usindu I Indústria Tahu-Hilin Aiaca, Fatuhada-Biquelipata no Mini Restaurante Misbachul, Aimutin-Makikit no Komoro Purti Bungsu.

Durante AIFAESA enserra restaurante sira ne’e, iha 17 mak reativa fali ona tanba tuir ona kritériu sobre ijiene nian.

Na’in ba restaurante Coli iha Bekora, Josefa da Costa Oliveira, bainhira AIFAESA ba enserra nia atividade sente todan tebes tanba iha difikuldade hodi bele tuir notifikasaun ne’ebé mak fó katak restaurante ne’e tenke taka ho serámika (keramik) ka buat ne’ebé fasil atu hamoos.

“Maizumenus ha’u bele tahan lai hodi buka osan lai para taka keramik. Agora ha’u hetan osan husi ne’e, oinsá mak bele taka keramik”, Josefa husu.

Entantu husi parte AIFAESA esplika katak bainhira iha prosesu reabilitasaun labele loke tanba hamosu rai-rahun no implika ba saúde ema nian bainhira loke restaurante, aumezmu tempu hadi’a mós.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here