Foto/Google.

DILI, (TATOLI)-Atubele halo teste kona-ba hahán ne’ebé kategoria ijiene no la ijiene, Autoridade Inspesaun no Fiskalizasaun ba Atividade Ekonómika no Sanitária (AIFAESA) seidauk iha laboratóriu ida hodi halo teste ba ida ne’e, nune’e difikulta tebes serbisu AIFAESA nian.

Diretór Operasaun, Gabriel da Costa, hatete maski seidauk iha laboratóriu, maibé AIFAESA halo koordenasaun ho Ministériu Saúde no Agrikultura no Peska hodi bele halo teste ba hahán sira ne’ebé sira deskonfia la ijiene.

“Ba teste laboratóriu, ami-nia tékniku sira hamutuk ho ministériu relevante para foti hanesan produtu tahu no tempe, no restaurante sira ne’ebé fa’an mie no pentolan sira ne’e nia amostra bá halo teste iha Ministériu Saúde”, katak Gabriel iha Fatumenta, ohin.

Hatutan tuir planu, iha 2018 ne’e AIFAESA atu harii laboratóriu, maibé tanba situasaun Timor-Leste nian daudaun ne’e maka  sei hein hela.

“Difikulta tebes se ita-nia laboratóriu lá sufisiente, difisil ami atu serbisu para haree produtu sira ne’ebé deskonfia hodi halo kontinuasaun ba hahán sira ne’e. Dezafiu boot liu ba AIFAESA, nune’e husu para ita-nia Governu liuliu ba iha Parlamentu para Governu foun mai karik haree hodi halo aprovasaun ba orsamentu atu halo laboratóriu”.

Sobre ijiene nia AIFAESA bazeia ba dekretu lei 28/2011 ne’ebé hatete bainhira loke restaurante ou fábrika ida tenke haree padraun ne’ebé iha.

Jornalista : Maria Auxiliadora

Editór : Manuel Pinto

HAKEREK NO HATÁN

Please enter your comment!
Please enter your name here