Bispo Dioseze Díli, Dom. Virgílio do Carmo da Silva, SDB. Foto: Dioseze Díli

DÍLI (TATOLI)-Reverendísimu Bispu Dioseze Díli, Dom. Virgílio  do Carmo, SDB konsidera katak valór fiar no kultura hamutuk mak hariku liután ita-nia juventude, tanba ne’e prezensa krús joven ninian, iha universidade sira, Kristu mak mestre boot liu hotu maski ita iha ita-nia profesór eh mestre sira.

“Ita tenke sente orgullu duni, inisiativa ne’ebé Dom Alberto husik hela mai ita. Hein katak Kristu ninia prezensa iha universidade sira, liuliu liuhusi Krús nia prezensa bele inspira nafatin, seja edukadór, alunus ka estudante sira atu buka buat ne’ebé aas liu iha ita-nia moris,” dehan Reverendísimu Bispu Dom. Virgílio  do Carmo, SDB, iha Katedrál Díli, Domingu ne’e.

Tanba, finalidade edukasaun ninian mak hatene buka buat hotu ne’ebé ita investe, atu bele deskobre buat ida de’it verdade [lia loos].

“Siénsia ninia hun mak lori ita hetan verdade. Kristu mak verdade nia hun. Bainhira ita loke ita-nia aan, ha’u hanoin, nia sei ajuda ita hotu atu nakfila ita-nia sentru, ita-nia família, universidade ba fatin hakmatek, ba fatin pás, fatin ba unidade,” akresenta  Reverendísimu Bispu.

Joven sira aproveita prezensa krús ninian atu pasa tempu, bainhira sente mesak, dezesperu, bainhira la hatene atu ba ne’ebé?

“Imi ba iha ne’ebá, tuur iha ne’ebá, halo imi-nia orasaun. Bainhira ita iha susar, iha dezánimu nia laran, ita fiar katak krús ida ne’e la’ós ai maten ida, maibé ai moris ninian, esperansa ninian,” dehan amu Bispu.

“Ne’e duni, ha’u hein katak imi sira ne’ebé mai buka matenek husi foho, mai husi fatin barak, mai buka matenek iha sidade, imi dala barak hetan problema, difikuldade iha família, iha eskola, iha imi-nia amizade, iha imi-nia estudu rasik, ida ne’ebé prontu nafatin mak ita-nia Kristu ne’ebé nafatin hamutuk ho imi, ba imi-nia di’ak, ita hotu nia di’ak iha formasaun,” haklaken Reverendísimu Bispu Dioseze Díli, Dom. Virgílio  do Carmo, SDB.

Enkuantu, iha omilia, Bispu Dom. Virgílio  do Carmo husu sarani liuliu foin sa’e sira atu halo obediénsia, hatudu umildade no halo karidade tuir evanjellu.

“Se ita sarani buka duni atu moris iha dalan ida ne’ebé koerente katak koerénsia ita-nia fiar ho vida sarani, nune’e bainhira ita iha momentu krusiál ita sei la mesak,” haklaken amu Bispu.

Jornalista: Rafy Belo

Editór : Manuel Pinto

 

HAKEREK NO HATÁN

Please enter your comment!
Please enter your name here