Sekretaria Estadu Igualdade Jeneru no Inkluzaun Sosial, Laura Menezes Lopes, iha seminariu konaba partisipasaun feto iha eleisaun antesipada. Foto Antonio Goncalves

DILI (TATOLI) –Sekretáriu Estadu Igualdade Jéneru no Inkluzaun Sosiál, Laura Menezes Lopes, hateten Timoroan sira tenke sensibilizadú hodi respeita prosesu demokrátiku, no respeita lideransa sira.

“Timoroan, tantu feto no mane liuliu feto sira nia papél importante liuhosi Sekretáriu Estadu Igualdade Jéneru no Inkluzaun Sosiál hodi hala’o edukasaun sívika, sensibiliza komunidade hodi respeita prosesu demokrátiku no respeita lideransa sira”Seigis, Laura Menezes Lopes hato’o iha nia intervensaun ba semináriu ho tema “Feto nia votu determina futuru nasaun,” iha Delta Nova, Segunda (26/03).

Nia hatutan, iha rejiaun Asian Timor-Leste sai modelu, basa hatudu prátika di’ak, ho maturidade iha prosesu polítiku eh impase polítika sira ne’ebé durante ne’e Timor hasoru.

atu asegura nafatin kredibilidade Timor-Leste iha matan internasional nian, Sekretáriu Estadu Igualdade Jéneru no Inkluzaun Sosiál sei kontinua halo edukasaun sívika hodi hasa’e konxiénsia komunidade eh feto sira hodi partisipa másimu durante festa demokrasia, ne’ebé sei realiza iha loron 12, Maiu, hodi kontinua mantein pás no estabilidade iha Timor-Leste.

Enkuantu iha prosesu edukasaun sívika ne’e Sekretáriu Estadu Igualdade Jéneru no Inkluzaun Sosiál, la la’o mesak, maibe kolabora nafatin ho organizasaun feto no sosiedade sivíl hotu.

iha parte seluk, Prezidente Rede Feto, Judite Dias Ximenes husu partidu polítiku sira atu promove nafatin feto iha vida polítika, nune’e bele hasa’e nafatin partisipasaun feto iha prosesu demokrátiku.

 Jornalista : Zezito Silva

Editór : Manuel Pinto

HAKEREK NO HATÁN

Please enter your comment!
Please enter your name here