Aeroportu Kay Rala Xanana Gusmão Suai. Foto Tatoli

DILI, (TATOLI) – Aeroportu Suai ne’ebé inagura ona iha tinan kotuk, tempu badak sei halo termu entrega husi kompañia ne’ebé kaer obra ne’e tanba investór mak hakarak uza fasilidade aeroportu.

“Ita hein fulan rua hanesan ne’e bele halo ona termu entrega para investór sira bele uza fasilidade aeroportu”, tenik Vise-Ministru Dezenvolvimentu ba Transporte no Komunikasaun, Inácio Moreira, ba jornalista sira iha Palásiu Governu, segunda (26/3).

Nune’e, Governante ne’e hasoru Xefe Governu hodi koordena ho ekipa husi project management unit atu finaliza aeroportu suai hodi fó aluga fasilidade ba investór sira.

Alende ne’e, nia haktuir enkontru ohin ko’alia mós kona-ba estensaun kontratu ba kontratór no konsultór ne’ebé halo hela konstrusaun aeroportu Suai hafoin efetua pagamentu nesesáriu tuir progressu konstrusaun.

Administrasaun Navegasaun Aériu Timor-Leste (ANATL-Air navigation Administration of Timor-Leste) ne’ebé hanesan jestór ba aeroportu mak sei prepara kontratu ba investór ne’ebé hakarak investe.

Antes ne’e, Empreza Northerm Oil & Gas Australia (NOGA) akompaña husi Vise-Ministru hasoru Primeiru-Ministru hodi ko’alia fasilidade ne’ebé kompañia ne’e atu uza iha aeroportu hodi halo esplorasaun ba minarai.

Alende halo investimentu iha aeroportu, kompañia ne’e sei rekruta timoroan hodi servisu iha ninia empreza. Nune’e mós sei servisu hamutuk Ministériu Saúde hodi transporta ema moras iha área ba kapitál rurál uza helikoptru.

Entretantu, iha loron 20 juñu 2017 Prezidente Repúblika, Francisco Lú Olo, inagura ona aeroportu ne’e.

Obra konstrusaun aeroportu ne’e hahú iha loron 30 maiu 2014, konstrui husi kontratór PT Waskita Karya (Persero), Tbk ho montante US$67,691,189.85, durasaun servisu loron 1163 no hetan fiskalizasaun husi konsultan Jurutera Perunding Zaaba.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here