Foto/ Facebook Boy Sabak.

DILI, (TATOLI) – Aventureiru timoroan, Atanásio Viana ne’ebé koñese ho naran Boy Sabak susesu hale’u munisípiu sira iha Timór laran, eseptu Oekusi ho motór boot durante oras 36 iha loron rua nia laran.

Viajen mota ne’ebé hahú iha 24 marsu 2018 iha tuku 06:00 dadersán ne’e komesa husi Dili-Manatutu-Baukau-Lospalos-Iliomar-Watukarabau-Uatulari-Vikeke ne’e halai durante oras ualu no termina iha Vikeke tuku rua loloos.

Iha etapa daruak 25 marsu nian, Vikeke-Natarbora-Betanu-Hatudu-Zumalai-Suai-Maukatar-Alto Lebos-Ojo-Maliana-Balibo-Batugadé-Likisá-Dili ne’e demora uitoan ho oras 13.

“Tanba ha’u nian fíziku drop uitoan, ha’u deskansa de’it (iha 24 kalan) oras haat tanba barullu uitoan, maibé alvu jerál ne’e ha’u bele atinje tanba atu sura de’it oras ida ha’u la’o ne’e entaun hamutuk oras 20 minutu 40 hanesan ne’e. Oras 36 ne’e sura ho ha’u deskansa sira ne’e, ne’ebé sura loos de’it ha’u sai tuku 06:00 ho tama fali tuku 06:00 loraik”, Boy hatete iha Palásiu Governu, ohin.

Durante viajen ne’e aleinde halai ho motór, Boy mós para iha fatin balun hodi hadi’a kámera ne’ebé monta ba motór no fahe brosura marka turizmu Timor-Leste nia “Explore The Undiscovered” ba abitante sira no fatin furak balun ne’ebé tenke para hodi halo nia imajen.

Totál kilómetru iha viajen loron dahuluk nian ne’e hamutuk 360 no daruak nian mak 460.

“Mas kondisaun dalan pertense husi Suai mai Maukatar, Alto Lebos, Ojo, Oeliu, dalan aat liu mak ne’e. Ne’ebé ha’u kleur loos iha uitoan ne’ebá tanba nia dalan susar duni no ha’u kuaze oras neen nia laran ha’u iha de’it área ne’e. Ha’u konsege liu no lamonu. Husi parte Lorosa’e nian, Lospalos, Iliomar, Vikeke, Uatulari dalan komesa di’ak uitoan ona”.

Entantu planu atu hale’u Timór iha oras 24 nia laran iha maiu ne’e, Boy adia ba agostu tanba hakarak halo eventu ne’e rame liután ne’ebé mós atu selebra loron FALINTIL ne’ebé monu iha loron 20.

“Ha’u aumenta tan motór tolu, maibé iha ne’ebá ha’u mak sei fó volta tomak, motór tolu ne’e ami fahe motór ida la’o bá rejiaun um, ida ba dois no ida seluk bá rejiaun três ho alvu 24 oras hotu mas ho rute ne’ebé lahanesan. Motór ida de’it mak sei fó volta tomak tanba haree ba nia CC ho tan esperiénsia, ne’ebé motór tolu ne’e sei halai tuir rejiaun de’it no sei halo buat ida ne’ebé mak iha relasaun ho loron FALINTIL”.

Eventu iha agostu ne’e sei iha ema ida husi Indonézia ne’ebé hola mós parte iha aventura mota ne’ebé mak sei konta hamutuk ho timoroan na’in tolu hodi soma hamutuk motór haat, maibé ida de’it mak fó volta Timor-Leste.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here