Primeiru Ministru, Marí Alkatiri ho nia komitiva iha Sentru Konvensaun Baucau simu hosi formatura hosi Baucau oan sira. Imajen Mídia Palásiu Governu.

BAUCAU (TATOLI)—Prezidente Autoridade Munisípiu Baucau, António Guterres, rekomenda ba Governu atu hadi’a estrada área rurál iha Munisípiu Baucau ho totál kilómetru 63.1 atu fó asesu di’ak ba eleisaun antesipada (EA) iha 12 Maiu tinan ne’e.

Guterres rekomenda kestaun ne’e liuhusi Konsultasaun Programa Sétimu Governu Konstitusionál ne’ebé hala’o hosi Primeiru Ministru, Marí Alkatiri ho nia komitiva ba autoridade munisípiu, autoridade lokál, komunidade, veteranu sira, reprezentante Igreja Katólika, sosiedade sivíl no reprezentante partidu polítiku sira ne’ebé hala’o iha Sentru Konvensaun Baucau, Vila Antiga, Postu Administrativu Baucau Vila, Munisípiu Baucau, Sesta (23/3).

Nia hatutan sentru votasaun hamutuk 14 maka la asesu ba eletrisidade no aldeia hamutuk 56 mós seidauk asesu ba enerjia eletrisidade.

“Administrasaun Munisípiu Baucau hala’o serbisu hamutuk ho Sekretariadu Tékniku Administrasaun Eleitorál (STAE) hodi hala’o identifikasaun ba sentru votasaun  ne’ebé asesu eletrisidade no la asesu ba eletrisidade,” António haktuir.

Iha Baucau, nia tenik, sentru votasaun iha 98, estasaun votu 123 no apoiu viaturas hosi nivel munisípiu ba eleisaun antesipada hamutuk 15, maibé presiza tan viaturas nune’e asegura sasán sensitivu sira to’o iha fatin votasaun.

 Munisípiu Baucau iha postu administrativu 6 maka hanesan Postu Administrativu Baucau Vila, Venilale, Laga, Baguia, Quelicai no Vemasse, suku hamutuk 59, númeru populasaun 128,000, totál eleitór 86,507 no totál eleitór ne’ebé vota iha tinan 2017 hamutuk 75,112.

Vise Ministru Obras Públikus, Mariano Renato hateten orsamentu dúo-désimu la to’o atu bele rezolve kestaun estrada át, maibé Institutu Jestaun Ekipamentu preparadu atu ajuda hadi’a dalan hodi asesu ba estasaun votu sira iha suku no aldeia.

“Ita presiza dadus klaru hosi STAE para ita bele koloka IJE. Ami reuniaun tiha ona ho tékniku sira hosi munisípiu hotu-hotu atu tau matan asuntu ida ne’e,” Renato esplika.

Kona-ba asuntu eletrisidade, Ministru Adjuntu Primeiru Ministru ba asuntu Governasaun, José Reis hahú ona dezloka iha territóriu Timor laran tomak hodi identifika suku no aldeia sira ne’ebé maka seidauk asesu ba eletrisidade.

Iha dezlokasaun ne’e, konsege dada eletrisidade ba komunidade balun. Governu apoiu ekipamentu eletrisidade no tékniku de’it maibé komunidade maka halo serbisu ho voluntáriamente hodi kuda riin eletrisidade.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here