Produtu ikan sardiña ne’ebé kontein vermes ne’ebé lansa husi BPOM Indonézia. Foto/Google.

DILI, (TATOLI)-Autoridade Inspesaun no Fiskalizasaun ba Atividade Ekonómika no Sanitária (AIFAESA) ne’ebé mak iha papél atu asegura saúde públika liuliu ba seguransa alimentár iha Timor-Leste alerta ba públiku atu labele konsome sardiña lata ho marka Mackerel tanba kontein ona vermes ka ular-oan.

Diretór Departamentu Planeamentu Operasionál, Risku Alimentár no Laboratóriu, Ângelo Edmundo Belo, informa relasiona ho fenómenu ikan lata ka sardiña ne’ebé kontein ular-oan no akontese iha provínsia Riau, Indonézia, ne’ebé deteta husi Balai Besar (servisu deskonsentradu) maka Badan Pengawas Obat dan Makan (BPOM) nia edifísiu sentrál iha Jakarta no provínsia refere halo investigasaun no analiza kle’an ida atubele klarifika ida ne’e, maka iha 22 Marsu BPOM lansa informasaun iha nia site ofisiál katak komersiál produtu ikan lata ida ne’e kontein duni ho ular oan mate.

Ikan lata ne’e ho marak Mackerel, maibé iha tipu oioin mak Mackerel Farmerjack ho númeru lisensa ba distribuisaun PBOM RI ML 543929007175 no nia númeru lote 3502/01106351356, Mackerel OI ho númeru lisensa BPOM RI ML 543929070004, númeru lote 370/12 Oktober 2020 no Mackerel Hoki ho númeru lisensa BPOM RI ML 543909501660, númeru lote 3502/01103/.

“Iha Indonézia agora daudaun sira halo investigasaun para produtu tolu ne’e labele sirkula iha sira-nia merkadu, retira kedan hodi halo destruisaun. Tanba ne’e mak liuhusi komunikasaun ne’ebé AIFAESA ho Badan POM, ami konfirma katak informasaun ne’e loos duni no ami foti konkluzaun ida katak nu’udar entidade kompetente ba seguransa alimentár iha Timor-Leste ami alerta ba konsumidór hotu no operadór ekonómiku para labele konsome no komersializa produtu ne’e tanba bele implika ba ema nia saúde”, Ângelo aviza ida ne’e iha Matadouru, ohin.

Atu asegura saúde públika ba produtu tolu ne’e, ekipa AIFAESA liuhusi departamentu operasaun, horisehik bá iha estabelesimentu sira no rekolla duni produtu balun (sardiña lata), maibé depois halo analiza, haree ba nia identifikasaun ne’ebé iha, nia númeru lahanesan ho númeru ne’ebé BPOM fó sai.

“Maibé komesa ohin, aban no semana oin investigasaun, fiskalizasaun ida ne’e la’o nafatin para bá haree produtu tolu ne’ebé daudaun sirkula iha ne’e para bele retira hotu. Badan POM to’o agora sei halo análize kontínua ba produtu sira seluk, la’ós tolu ne’e de’it, para bele haree karik iha tan sardiña balun ne’ebé kontamina ho ular-oan ne’e, depois sira sei informa fali mai iha ne’e atu ita bele halo atuasaun”.

Jornalista : Maria Auxiliadora

Editór : Manuel Pinto

HAKEREK NO HATÁN

Please enter your comment!
Please enter your name here