VIQUEQUE (TATOLI)--Administradór Postu Administrativu sira iha Munisípiu Viqueque maka hanesan Postu Administrativu Viqueque Vila, Uatulari, Uatucarbau, Lacluta no Ossu preokupa ba estrada sira iha área rurál.

Tuir administradór postu sira katak estrada ligasaun hosi postu administrativu ba suku no aldeia ho kondisaun át ne’ebé difikulta tebes komunidade sira atu partisipa iha eleisaun antesipada (EA).

“Ami iha ne’e entuziazmu tebes atu ba vota maibé problema maka estrada át,” Adminidtradór Postu Administrativu Uatucarbau, Mateus Martins Pinto, Administradór Postu Administrativu Uatulari, Tomás Soares da Silva, Administradór Postu Administrativu Ossu, Augusto de Sousa, Administradór Postu Administrativu Lacluta, José de Andrade dos Santos no Administradór Postu Administrativu Viqueque Vila, António Gregório, levanta kestaun ne’e liuhusi Konsultasaun Programa Sétimu Governu Konstitusionál iha edifísiu Administrasaun Munisípiu Viqueque, Munisípiu Viqueque, Kinta ne’e.

Administradór postu hirak ne’e rekomenda ba Governu atu hadi’a estrada ne’ebé át ho emidiatamente nune’e bele garante tasa partisipasaun eleitór iha eleisaun antesipada.

Entretantu, veteranu balun iha Konsultasaun Programa Governu refere deklara katak sira sei halo esforsu tomak atu mobiliza komunidade para bele ba vota iha eventu demokrátiku ne’ebé mai.

Responde preokupasaun kona-ba estrada, Vise Ministru Obras Públikas, Mariano Renato hateten iha tempu badak nia sei serbisu hamutuk ho órgaun eleitorál sira atu rekolla dadus kona-ba númeru estasaun votasaun iha área rurál.

“Hosi númeru ne’e maka sei indika katak estasaun votasaun hira maka la asesu ba estrada no estrada át nune’e ami bele autoriza Institutu Jestaun Ekipamentu (IJE) para bele loke no hadi’a estrada hodi fasilita komunidade,” Renato informa.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here