Militantes no simpatisantes Partidu Fretilin wainhira partisipa iha kampanha Parlamentar nian iha Tasi Tolu, Dili 19 Juilu 2017.Timor Leste sei halao eleisaun Parlamentar iha dia 22 Juilu. Foto TATOLI/Antonio Goncalves

DILI (TATOLI) – Mandatóriu partidu Frente Revolusionáriu Timor-Leste Independente (Fretilín), Roberto Geronimo, dehan partidu Fretilín mai aprezenta lista kandidatura ba deputadu Parlamentu Nasionál (PN) nian iha Tribunál Rekursu (TR), maibé falta de’it kandidatu ida mak seidauk asina lista.

“Ohin loron ikus ba aprezentasaun lista kandidatura ne’ebé ami aprezenta maibé falta de’it Ricardo da Costa Ribeiro nu’udar kandidatura ne’ebé ladauk asina, tan lori jogadór sira ba nasaun Myanmar, maibé nia halo deklarasaun ba Tribunál Rekursu katak kuandu bainrua nia fila mak mai asina hodi kompleta eh prienxe rekizitu” Reprezentante partidu Fretilín, Roberto Geronimo ba Jornalista sira hafoin aprezenta lista kandidatura ba TR iha Kaikoli, Kuarta (21/03).

Ikus mai partidu Fretilín konsege aprezenta lista, maibé kontinua hein kandidatura Ricardo da Costa Ribeiro mai hosi Myanmar hodi kompleta rekizitu.

Entretantu kandidatu deputadu Fretilín, Ricardo Ribeiro aseita ona no nia sei fila hosi Myanmar atu asina tanba nia rasik halo ona deklarasaun no hato’o ona mai tribunál,” Roberto Geronimo garante.

Lista kandidatura partidu Fretilín ne’ebé aprezenta iha Tribunál Rekursu hamutuk ema na’in 90, na’in 65 efetivu no suplente na’in 25.

Akontesimentu seluk iha Tribunál Rekursu ohin antes Fretilín submete lista kandidatura deputadu ba eleisaun antisipada kandidata Sançia Bano mós retira-an, maibé iha momentu hanesan substitui hikas kedan.

Tuir informasaun lista kandidatura deputadu hosi bankada Fretilín ba tinan ida ne’e figura atuál Ministru Defeza no Seguransa, Somotco no atuál Primeiru Ministru, Mari Alkatiri mantein iha lista nu’udar kandidatu ba deputadu.

Enkuantu ohin loron, Kuarta (21/03) nu’udar loron ikus ba partidu sira hodi aprezenta lista kandidatura ba Tribunál Rekursu

Jornalista : Zezito Silva

Editór : Manuel Pinto

HAKEREK NO HATÁN

Please enter your comment!
Please enter your name here