Embaixadór União Europeia, Alexandre Leitão

DÍLI, (TATOLI)-Uniaun Europeia [UE] sei apoia programa agro-florestasaun sustentável ba joven timoroan sira, feto no mane, hodi diversifika ekonomia iha rai laran nó mós iha rejiaun.

“Nia objetivu mak hahú husi realidade timoroan sira nian, rurál. Ami hakarak ajuda povu timoroan sira iha tan empregu, kria tan rikeza, diversifika ekonomia atu nune’e ekonomia Timor nian bele menus depedente ba iha petróleu,” dehan embaixadór Uniaun Europeia (EU), Alexandre Leitão, ba Ajénsia TATOLI, iha Hotel Timor, ohin.

Objetivu jerál mak kontribui ba pás, eskluzividade no dezenvolvimentu sustentável iha Timor-Leste liuhusi kriasaun empregu, hadi’a asesu ba área rurál, kria oportunidade hodi hasa’e rendimentu no redús inseguransa ai-han no mal-nutrisaun iha área rurál.

“Entaun hahú husi realidade rurál iha Timor mak propriedade ki’ikoan, la’ós ba ema ne’ebé monokulturál [la’ós prodúz de’it buat ida],” nia reforsa tan.

Embaixadór ne’e akresenta, importante produtór ki’ikoan sira ne’e, iha floresta oi tuan, produsaun agríkola oi tuan bele hetan alkansamentu ne’ebé mak di’ak, hodi aproveita jere di’ak liután parte husi floresta.

Tanba ai-kabelak iha valór komersiál barak liu, ema barak buka ai-kabelak iha mundu tomak no iha rejiaun laran, iha nasaun rasik.

Entaun sujere bainhira agrikultór sira bele, aproveita ho di’ak, Mellor posivel valór husi ai-kabelak ne’e, sei kria rendimentu, sei kria empregu iha rejiaun. “Ne’e mak pontu fundamentál,” salienta embaixadór ne’e.

Formasaun ba Joven Rurál

Embaixadór Alexandre Leitão mós akresenta katak aspetu seluk husi programa ida ne’e, EU ho Organizasaun Internasionál Traballu nian, ezekutadu husi projetu Alemaun, GIZ [Gesellschaft für Internationale Zusammenarbeit].

Programa ida ne’e ezekutadu husi organizasaun Internasionál Traballu, Nasaun Unida nian hodi ajuda forma emprezáriu ka hanorin joven emprendedór sira, feto no mane hodi iha empreza ki’ik, halo ba konstrusaun estrada, obra públika, hodi bele aproveita husi governu, iha loron ruma, hodi halo obra públika ne’ebé mak nesesária.

Kona-ba koñesimentu, la’ós de’it teóriku, ema ida idak ne’ebé sei formada, sei halo nia empreza ki’ik ida, pelumenus estrada kilómetru rua, aprende halo.

Ida ne’e la’ós programa hodi halo estrada maibé programa ida hodi hanorin ema halo estrada, ho ida ne’e ita sei halo kilómetru balun iha área rurál sira iha nasaun ne’e.

“Purtantu, programa rua ne’e ita tenke halo durante tinan lima no tenke iha rezultadu. Ita hakarak hetan kapasidade di’ak liu atu halo di’ak estrada sira ne’ebé agrikultór sira presiza lori sira-nia produtu ba merkadu sira no ba agrikultór sira, feto no mane sira, prodúz liután no hetan liután, kria liután empregu, kria liután rikeza,” nia realsa.

Formandu sira hotu mesak timoroan, ajénsia hanorin de’it. “Idea mak kria kapasidade lokál timoroan sira iha Timor,” nia fó razaun.

Entretantu projetu ne’e iha komponente rua; komponente primeiru mak atu dezenvolve sistema agro-floresta ida ne’ebé sustentável no sei simplesmente implementa husi GIZ, serbisu hamutuk ho Ministériu Agrikultura no Peska ho instituisaun relevante sira.

Komponente primeiru ne’e iha totál euro millaun18 [Uniaun Europeia kontribui millaun 13 no governu Alemaña kontribui millaun lima].

Komponente segundu mak hadi’a asesu ka hadi’a dalan ba área rurál sira, liuliu ba área sira ne’ebé projetu agro-floresta ne’e atu implement aba. Segundu komponente ne’e sei implementa husi ILO [Organizasaun Mundiál Traballu, sigla inglés].

Jornalista: Rafy Belo

Editór : Manuel Pinto

http://www.tatoli.tl/2018/03/ue-alemana-tulun-tl-dezenvolve-agrofloresta-sustentavel/

 

HAKEREK NO HATÁN

Please enter your comment!
Please enter your name here