Prezidente Tribunál Rekursu, Deolindo dos Santos. Imajen Mídia Palásiu PR.

DILI, (TATOLI) – Prezidente Tribunál Rekursu (TR), Deolindo do Santos, hatete hafoin halo verifikasaun iha loron 10 nia laran, TR sei fó sai rezultadu verifikasaun lista molok loron paskua.

“Kleur liu iha loron 31 marsu, Tribunál Rekursu sei fó sai rezultadu verifikasaun”, afirma Deolindo do Santos ba jornalista sira hafoin simu lista kandidatura hosi partidu polítiku sira iha loron ikus iha TR, Kaikoli, kuarta (21/3).

Nia dehan ohin loron ikus ba loron 30 ne’ebé lei permite TR atu simu lista kandidatura mai hosi partidu polítiku sira eh koligasaun partidária hotu ne’ebé atu konkore eleisaun antesipada.

TR simu ona lista kandidatura hamutuk 10, iha partidu 15 mai ho koligasaun mak Aliansa Mudansa ba Progresu (AMP), MSD, FDD no FDN inklui partidu balun mak mai ho individuál hanesan Partidu Frente Revolusionáriu Timor-Leste Independete (Fretilin), Partidu Demokrátiku (PD), Partidu Esperansa Pátria (PEP), Partidu Traballista, KOTA, no Asosiasaun Sosiál Demokrátika Timorense (ASDT).

TR simu lista kandidatura hosi partidu polítiku sira, hirak ne’e mak TR sei haree tuir lei katak iha loron 10 nia laran sei hasai desizaun katak entre lista kandidatura 10 ida ne’ebé mak priénse kritériu legál atu tuir eleisaun.

Enkuantu, verifikasaun lista dadaun ne’e la’o ona tanba servisu hamutuk ho Sekretariadu Tékniku Administrasaun Eleitorál (STAE) no sei haruka tan lista hirak ne’e atu órgaun eleitorál bele verifika.

Hafoin halo verifikasaun, TR sei haree karik buat ruma falta, sei bolu atu kompleta iha loron rua nua laran hafoin bele prenxe regra tanba ida ne’e lei mak haruka.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here