Sekretária Estadu Feto no Inkluzaun Sosiál, Laura Pina, soru-mutu ho feto potensiál Lautém no mane kona-ba partisipasaun iha eleisaun antesipada. Imajen Ajénsia Tatoli/Xisto Freitas.

LAUTEM (TATOLI)–Estadu ba Feto no Inkluzaun Sosiál, Laura Pina hateten Sekretaria Estadu ba Feto sei serbisu hamutuk ho órgaun eleitorál hanesan  Sekretariadu Tekniku Administrasaun Eleitoral (STAE) no Komisaun Nasionál Eleisaun (CNE-sigla Portugés) atu bele lori feto no mane partisipa iha eleisaun antesipada.

“Serbisu hamutuk ho sentidu prepara programa planeamentu ho prespetiva jéneru atu bele lori feto no mane partisipa ho inkluzivu liu-tan,” Laura hato’o informasaun ne’e liuhusi Konsultasaun Programa Sétimu Governu Konstitusionál iha Jináziu Lospalos, Postu Administrativu Lospalos Vila, Munisípiu Lautém, kuarta ne’e, hafoin responde feto potensiál sira nia pergunta kona-ba Sekretaria Estadu ba Feto no Inkluzaun Sosiál nia programa atu enkoraza feto no mane atu partisipa iha eleisaun antesipada.

Iha segunda semana oin, nia informa, sira sei halo soru-mutu ida iha Dili ho órgaun eleitorál sira hodi buka meius oinsá atu hasa’e komunidade (feto no mane) inklui defisiente sira nia konsiénsia para partisipa iha eleisaun ho inkluzivu.

Iha biban ne’e, komunidade feto sira preokupa kona-ba mandatu Asosiasaun Potensiál Feto Munisípiu ne’ebé sei ramata jullu tinan ne’e, maibé seidauk iha preparasaun ruma atu hala’o kongresu.

Hatán ba asuntu ne’e, Laula Pina tenik, asuntu ida ne’e tama ona iha programa Sétimu Governu Konstitusionál maibé labele realiza tanba opozisaun (bankada CNRT, PLP no KHUNTO) vota kontra no la vota kontra karik oras ne’e tama ona iha preparasaun.

Maske nune’e, Pina dehan, iha parseiru dezenvolventu barak maka fó atensaun ka apresia tebes ba igualdade jéneru no inkluzaun sosiál.

“Ami halo ona esforsu atu hetan fundus para iha jullu ka agustu tinan ida ne’e ita halo segundu kongresu Asosiasaun Feto Potensiál Munisípiu atu rezolve dezafiu ne’ebé durante ne’e iha,” Pina afirma.

Nia husu ba feto potensiál sira hosi Munisípiu Lautém atu fó konfiansa ba Sétimu Governu Konstitusionál hodi dezenvolve kbiit egualdade jéneru.

Enkuantu, Primeiru Ministru, Marí Alkatiri mós kontinua apela ba autoridade munisípiu atu mobiliza komunidade hodi partisipa iha eleisaun antesipada.

Marí esplika Governu prepara ona kondisaun másimu, katak habelar sentru votasaun besik liu komunidade nia hela fatin atu hotu-hotu partisipa iha eleisaun.

Tuir nia katak eleisaun ida ne’e importante no determinante tebes tanba atu kria Governu ida estável atu evita inpase polítika ba beibeik.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here