Komunidade Lautém rona konsultasaun programa sétimu governu konstitusional. Imjen Ajénsia Tatoli/Xisto Freitas.

LAUTEM (TATOLI)–Komunidade Lautém levanta ba Primeiru Ministru, Marí Alkatiri hodi hetan klarifikasaun katak bainhira loos maka dada kadoras (pipeline) hosi kampu minarai Greater Sunrise mai Timor-Leste.

Dúvida ne’e komunidade ida levanta ba Primeiru Ministru, Marí Alkatiri ho nia komitiva iha Konsultasaun Programa Sétimu Governu Konstitusionál ne’ebé hala’o iha Jináziu Lospalos, Postu Administrativu Lospalos Vila, Munisípiu Lautém, Kuarta ne’e.

António da Silva, komunidade Lospalos Vila liuhusi nia intervensaun hateten ikus-ikus ne’e iha grupu balun iha Lospalos hahú lansa informasaun katak iha tempu badak nia laran sei dada kadoras mai Timor-Leste.

“Ami kontente rona informasaun ida ne’e. Nune’e, ami husu ba Primeiru Ministru ho membru Governu sira katak sá fulan maka atu dada kadoras mai,” António dehan.

Nia hatutan joven sira hosi Lospalos barak maka kansela ona sira nia viajen ba rai liur hodi buka serbisu tanba sira fiar katak bainhira kadoras mai Timor-Leste, sei loke kampu serbisu ba timoroan sira barak.

 Hatán ba kestaun ne’e, Primeiru Ministru, Marí Alkatiri hateten se agora maka atu asina dada kadoras, sei lori tempu tinan 10 ka 15 maka kadoras foin to’o iha Timor, la’ós aban ka bainrua mai ona.

“Ne’e kestaun teknika. Molok asina dada kadoras, ita halo uluk negosiasaun. La’ós nasaun rua de’it maka tama iha negosiasaun, maibé mós kompania,” Xefe Governu esplika.

Iha konsultasaun programa Governu ne’e, komunidade Lautem mós preokupa ba estrada iha Lospalos Vila no ba postu administrativu sira iha Munisípiu Lautém ne’ebé iha kondisaun át.

“Uluk kedas Governu promete atu hadi’a ami nia estrada maibé to’o ohin loron laiha rezultadu. Oinsá povu bele sente dezenvolvimentu bainhira la kria kondisaun ba povu,” Mauricio Cristovão, komunidade Suku Mehara, Munisípiu Lautém, levanta asuntu ne’e iha konsultasaun programa Governu.

Entretantu, Xefe Governu Marí Alkatiri hatán katak problema hirak ne’e maka tau iha programa Sétimu Governu Konstitusionál atu implementa maibé opozisaun iha Parlamentu Nasionál rejeita tiha.

Ne’e duni, nia promete katak bainhira partidu rua (FRETILIN no PD) kontinua lidera Oitavu Governu Konstitusionál ne’ebé mai, sei tau prioridade maka’as ba bee-moos, estrada, habitasaun ba komunidade no asuntu importante sira seluk ne’ebé liga direta ba povu Nia Moris.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here