Autoridade lokál, komunidade reprejentante sosiedade sivil, veteranu no relojioso, bainhira partisipa atividade diálogu ho Primeiru-Ministru iha Jinasiu Lospalos, ohin. Foto Tatoli/Xisto Freitas

LAUTEM, (TATOLI) – Primeiru-Ministru, Marí Alkatiri, hateten auditória ne’ebé oras ne’e halo ba Zona Espesiál Ekonomia Sosiál Merkadu (ZEESM), Ministériu Infraestrutura, Ministériu Turizmu no Ministériu Finansas la’ós atu halo persegisaun polítika ba ema ruma tanba en-prinsípiu la’ós atu buka ema nia sala.
Nia katak karik deskobre ema ruma nia sala, ne’e la’ós Governu nia responsabilidade maibé setór justisa nia responsabilidade.

“Ema ida atu tama ukun nia tenke hatene loloos situasaun orsamentu nian, situasaun funsionáriu nian no empeñamentu serbisu iha ministériu ida-idak nian la’o oinsá”, Xefe Governu hato’o kestaun ne’e liuhusi Konsultasaun Programa Sétimu Governu Konstitusionál ba autoridade, komunidade, reprezentante Igreja Katólika no reprezentante ONG lokál, ne’ebé hala’o iha Jináziu Lospalos, Postu Administrativu Lospalos Vila, Munisípiu Lautém, kuarta ne’e.

Tanba ne’e, nia husu ba ema hotu atu labele tauk auditória tanba ne’e prosesu normál ne’ebé la’o iha governasaun nasaun barak.

Liga ba empeñamentu serbisu Governu anterior, nia haktuir prosesu dezenvolvimentu durante 10 resin konsentradu liu iha Dili maske gasta orsamentu barak.

“Biar iha Dili maibé ita haree dezenvolvimentu la integradu, la organizadu ka nar-naran de’it. Ita haree iha Lospalos, Lospalos nia kondisaun furak tebes atu halo dezenvolvimentu maibé la akontese. Nune’e mós iha munisípiu sira seluk. Tanba ne’e, bele dehan serbisu barak la fó rezultadu ba povu no Nasaun”, realsa Marí.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here