Estudante Fakuldade Medisina, Siénsia no Saúde (FMSS), Universidade Nasionál Timor Lorosa’e (UNTL). Foto: FMSS

DILI, (TATOLI) – Fakuldade Medisina, Siénsia no Saúde (FMSS), Universidade Nasionál Timor Lorosa’e (UNTL) liuhusi Asosiasaun Akadémika Estudantil (AAE) sei organiza kalan kultura ho atividade oioin hodi komemora loron Mundiál Saúde ne’ebé tinan-tinan komemora iha 7 abril.

Atividade ne’e sei hala’o iha Sekretariu Estadu Desportu ba Promosaun Alta Kompetisaun Sionál, durante loron rua, 6 to’o 7 abril, tuku 18.00 to’o 23.00.

Reprezentante Komisaun Organizadora ida, Atanasio da Costa Flores. Foto FB: Atanasio Flores

“Objetivu ne’e atu haburas kultura timor nian no promove estudante sira-nia talentu no kreatividade ne’ebé mak sira ida-idak iha”, haktuir reprezentante Komisaun Organizadora, Atanasio da Costa Flores, ba TATOLI iha Kampus FMSS Kaikoli, ohin.

Nia dehan atividade ne’e inisiativa estudante no estrutura FMSS ho tipu kompetisaun hanesan dansa kultura, aprezentasaun moda, kultura. Nune’e mós dadolin, knananuk pop, teatru, DJ no ikus mak baraka koko tensaun, koko ran midar. Alende ne’e promove ekipa primeiru sokoru no hatudu hahan tradisionál husi munisípiu 12 inklui Rejiaun Autonomia Administrativa Ekonómika Oekusi-Ambeno.

Ema ne’ebé atu tama uza tikete, partisipante babain dolár rua, bele asiste no check up médiku. Ba VIP (Very Importante Person) dolár lima, bele asesu no asiste, tuur iha kadeira, hetan snack nomós konsulta médika.

Preparasaun atividade mak estudante, senadu sira hahú buka fundu ho negósiu iha kampus no iha li’ur. Estudante balun fa’an iha kampus no balun lori tuir ba eskritóriu sira ne’ebé mak enkomenda ka hameno.

Atividade negósiu ne’ebé mak FMSS halo mak  fa’an hahan (matabisu; paun xokolate, xá. meúdia; nasi bungkus eh etu falun ho folin sentavu 50), fa’an ai-fuan malirin (frutas jeladu), hahan merenda nian mak onde-onde (dose Indonézia), batar funan, bee iha garrafa (bee aqua) no seluktan.

“Hahú halo rejistu ona atividade sira ne’ebé mak atu aprezenta durante kalan rua, no estudante Fakuldade Medisina no Siénsia Saúde sei halo audisaun iha sábadu, 23 marsu antes aprezenta no husi fakuldade seluk iha UNTL mós mai rejistu ona tuir kompetisaun nomós seksaun sira seluk prepara ona”.

Nia katak tan tuir planu FMSS sei konvida reprezentante Organizasaun Mundiál Saúde (OMS), Ministériu Saúde no reitória, reitór UNTL, Francisco Miguel Martins.

Entretantu, to’o oras ne’e preparasaun ba atividade ne’e seidauk hetan patrosíniu eh apoiu direta no indireta husi organizasaun, empreza ka entidade ruma.

Loron Mundiál Saúde, tinan-tinan organiza iha 7 abril, loron ne’e eskolla husi OMS iha 1948 iha primeira asembleia OMS nian. Hahú 1950, ofisialmente Loron Mundiál Saúde hala’o iha 7 abril.

Kada organizasaun eh autoridade saúde sira iha mundu ida-idak sei hili tema sentrál ba sira-nia komemorasaun, enkuantu OMS, tinan ida ne’e realiza loron internasionál saúde ho tema prinsipál saúde ba ema hotu. OMS komemora ba da-70.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here