Sekretáriu Estadu Juventude no Traballu (SEJT), Nívio Leite Magalhães.

DILI, (TATOLI) – Sekretáriu Estadu Juventude no Traballu (SEJT), Nívio Leite Magalhães, anúnsia sei revee fila programa haruka traballadór sira bá Korea liuliu iha prosesu selesaun tanba tenke haree ba koñesimentu kona-ba serbisu ne’ebé sei hala’o iha Korea, kondisaun fíziku no saúde nian.

“Tanba realidade traballadór balun to’o iha Korea mak foin deteta sira-nia moras no balun ne’ebé serbisu iha peska nunka iha esperiénsia tama tasi to’o iha ne’ebá balun labele hala’o nia knaar ho di’ak tanba sira latoman serbisu iha tasi”, Nívio hatete liuhusi konferénsia imprensa ne’ebé hala’o iha Kaikoli, ohin, hodi fó sai rezultadu vizita Korea nian iha loron 12 to’o 18 marsu ne’e.

Hatutan iha prosesu selesaun ne’e, orientasuan ba traballadór sira sei inklui mós traballadór sira ne’ebé filafali mai ona Timor-Leste atu fahe sira-nia esperiénsia kona-ba serbisu iha Korea, nune’e bele iha koñesimentu ne’ebé di’ak ba kandidatu traballadór sira.

“Sei haree filafali kona-ba kursu lia-korea, haree ba nia kurríkulu ne’ebé iha, atu nune’e traballadór sira ne’ebé atu bá serbisu oha Korea ne’e tenke iha koñesimentu di’ak kona-ba lia-korea ne’e tanba iha esperiénsia ha’u rona husi traballadór iha Korea katak balun to’o iha ne’ebá iha termu tékniku balun ne’ebé sira ladún komprende, ida ne’e mak halo empregadór dalaruma hakilar sira no fó tratamentu ladi’ak ba sira”.

Aleinde ne’e sei haree filafali osan ne’ebé traballadór sira tenke hatama antes sira bá Korea katak traballadór uluk no agora ne’e ida-idak tenke hatama dólar 2000.

“Ha’u sei haree filafali utilizasaun husi osan ne’e. Ami sei haree fali atu nune’e osan ne’ebé sira hatama bele utiliza didi’ak ba nesesidade traballadór sira-nian. Sei haree mós kontratu ne’ebé selebra ho traballadór sira, atu nune’e empregadór sira mós tenke respeita kontratu ne’e. Se traballadór ida sai husi Timór atu bá serbisu iha área peska, nia tenke serbisu iha peska nian la’ós peska tiha aumenta tan serbisu seluk”.

Tanba ne’e SEJT sei ko’alia ho Ministériu Empregu no Traballu no parte Dezenvolvimentu Rekursu Umanu (HRD-sigla inglés) Korea nune’e empregadór sira tenke hakruuk ba kontratu.

“Bainhira traballadór sira bá Korea ona, SEJT sei halo esforsu hotu liuhusi adidu traballu ne’ebé destaka bá Korea atu tau matan ba traballadór sira. Sira tenke prontu 24 horas atu atende ba traballadór sira ne’ebé serbisu iha Korea nomós SEJT sei koordena no halo serbisu di’ak, besik ho embaixada Timor-Leste iha Korea nune’e asegura implementasaun programa ne’e ho di’ak”.

Desizaun ne’e hasai hafoin SEJT hala’o vizita ofisiál iha Korea foin lalais ne’e bá hasoru malu ho traballadór timoroan, HRD no Ministériu Empregu no Traballu.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here